KORSOU: ACU TA EMPODERÁ HÓBENNAN PA LIDERÁ NOS KOMUNIDAT DI MAÑAN

Willemstad, 25 di novèmber 2024 – Na ACU nos ta kere ku kada hóben por bira un lider mañan. Pero pa logra esei, nan mester ta prepará ku konosementu, hèrmèntnan i inspirashon.

Nos ta pone edukashon i formashon sentral, pasobra nos sa ku e lidernan ku nos forma awe, ta e komunidat fuerte di mañan. Inspirá pa e prinsipio di kooperativa number 5– “Edukashon, formashon i informashon” – nos a dediká un siman spesial pa sembra e simia di transformashon bou di nos hóbennan.

Empoderando hóbennan pa logra nan potensial

Den e siman tras di lomba, ACU a organisá un serie di aktividat ku a pone e hóbennan sentral:

• Djaluna, 18 di novèmber: Na e apertura di Global Entrepreneurship Week na PWFC, ACU a inspirá hóbennan di Nilda Pinto SBO pa deskubrí e benefisionan i posibilidatnan di kooperativismo. E enfoke tabata: kon kooperativismo por ta un plataforma pa nan logra nan soño empresarial i bira un motor pa un komunidat sostenibel.
• Djamars, 19 di novèmber: ACU a intensifiká e esfuersonan ku un bishita na Nilda Pinto SBO, kaminda studiantenan a risibí un tarea úniko: krea nan propio negoshi uzando e modelo di kooperativa. Nan a pone e prinsipionan di kooperativa den práktika, i a deskubrí kon e toma desishon den grupo por stimulá kreatividat i solushon kolektivo.
• Djabièrnè, 22 di novèmber: Na un seshon informativo pa di Albert Schweitzer HAVO/VWO i Hóben Balente di House of Worship, ACU a enfoká riba konsientisashon: kon kooperativa ta funshoná, i kon nan mes por implementá e konsepto pa kreá un komunidat mas fuerte. Un rekorido eksklusivo na ACU su brènch na Sta. Maria a duna nan un bista real di e operashonnan diario di un ‘credit union.’
• Djasabra, 23 di novèmber: ACU a kulminá e siman ku e vibrante “Abeguitu Kids Event.” Mas ku 200 muchanan entre 6 i 15 aña a risibí edukashon finansiero tokante di maneho di plaka, sparmentu, invershon, presupuesto, i pone meta. Tur esaki na un manera dibertido i interaktivo. Pasobra manehá plaka sabi awe, ta e fundeshi di stabilidat i kresementu di mañan.

Formando lider pa mañan

Den tur loke ku nos hasi, un kos ta opvio: ora bo duna un hóben konosementu i inspirashon, bo ta habri nan potensial pa transformá nan bida i nan komunidat.

E aktividatnan no tabata solamente tokante di hasi negoshi; na tabata prinsipalmente tokante di stimulá e hóben pa pensa grandi, traha huntu, i krea un futuro briante.

Kreando un komunidat mas fuerte

ACU ta konsiente ku e lider di mañan mester di un bon fundeshi awe. Pasobra un komunidat fuerte no ta basá solamente riba ekonomia; e ta basá riba hende ku tin e konosementu i motivashon pa aktua. Den 2025, nos lo sigui konsientisá mas hóbennan, apoyá negoshinan chikí i mediano, i enfoká nos esfuersonan riba inovashon i digitalisashon.

Pasobra nos ta kere den un futuro ku nos por logra a huntu – ku lidernan ku nos ta forma awe!

FUENTE:ACU KORSOU/LIVE99FM