DIKON KOMISHON PARLAMENTARIO HULANDES TA TENE PROGRAMA DI BISHITA NA BONEIRU SEKRETO? ESAKI TA DEMOKRÁTIKO?

Kralendijk,- Via prensa a tuma nota ku e Komishon Permanente pa Relashon di Reino di Tweede Kamer ku ta bishita Boneiru djaweps, 22 di òktober 2026. Sin embargo, e programa, inkluyendo e aktividatnan plania i reunionnan ku funshonarionan i organisashonnan lokal, ta keda konfidensial. E komishon a indiká ku esaki ta debí na riesgonan di seguridat pero prensa a raporta tambe ku medionan di komunikashon no a risibí invitashon.

E desishon aki ta lanta preguntanan legítimo tokante transparensia, responsabilidat demokrátiko i partisipashon públiko. Kua temanan e miembronan di Parlamento ku ta bishitá lo trata? Ken nan opinion nan lo skucha? Habitantenan i periodistanan tin oportunidat pa hasi pregunta? Desishonnan ku ta tuma na Den Haag tin influensia direkto riba gobernashon di Boneiru, servisio públiko i futuro polítiko di e isla. Pueblo tin derecho di haña klaridat tokante e propósito i e resultadonan di e bishita aki.

Segun medionan di komunikashon, e miembro di parlamento di PVV, Vlottes, ku resientemente a presentá un moshon pa pone Boneiru bou di kuratela gubernamental, no lo partisipá den e bishita. E motibu pa su ausensia no a keda públika. Kiko kuratela gubernamental lo nifiká pa e representantenan elegí di Boneiru, pa responsabilidat demokrátiko i pa protekshon di e derechonan fundamental i inalienabel di e pueblo?

E eksperensia di Sint Eustatius na 2018 ta un advertensia serio. Gobièrnu Hulandes a intervení, disolvé e Konseho Insular elegí i kita e miembronan di e Kolegio Ehekutivo di e isla di nan puesto, bou di un lei traha I impone for di Den Haag. Sekretario di Estado pa Relashonnan di Reino, Raymond Knops, a ehekuta e intervenshon. Representantenan elegí di Statia a wordu baha i reemplasá pa un komishonado gubernamental nombrá pa Den Haag. E restablesementu di gobernashon lokal elegí a tuma varios aña. Na 2023, Algemene Rekenkamer di Hulanda a investigá e intervenshon i a deskribí e situashon komo un presedente hopi preokupante.

“Bo silensio no lo protehá bo”  (di Audre Lorde) tin un nifikashon spesialmente importante awe, pasobra silensio no ta protehá demokrasia. Unda e lidernan polítiko di Boneiru tabata ora e gobièrnu elegí di Sint Eustatius a wordu kita? Ken a defendé públikamente e derechonan demokrátiko di e pueblo di Statia i di nan representantenan kontra e intervenshon impone pa Den Haag?

Derechonan demokrátiko no mester wordu defendé di forma selektivo, dependiendo di afiliashon polítiko òf interes personal. Keda ketu ora e derechonan di un isla ruman ta bou di menasa por debilitá mesun e prinsipionan ku ta nesesario pa protehá bo propio pueblo.

Lidernan polítiko di Boneiru mester rekonosé ku koperashon polítiko òf silensio no ta duna garantia kontra un intervenshon den futuro. E pregunta ta si un intervenshon asina ta konsistente o kuadra ku e obligashonan aplikabel di derecho internashonal i di derechonan humano.

Hulanda, komo un di e paisnan fundadó di Nashonan Uní, tin e responsabilidat di sostené e prinsipionan di e Charter di Nashonan Uní i su obligashonan internashonal aplikabel. Artíkulo 1(2) di e Charter ta rekonosé e prinsipio di igualdat di derechonan i outodeterminashon di pueblo. Deklarashon Universal di Derechonan Humano ta sostené dignidat humano, igualdat i partisipashon demokrátiko. Artíkulo 1 di tur dos Paktonan Internashonal ta rekonosé e derecho di tur pueblo pa determiná nan propio futuro polítiko.

Mester tuma e prinsipionan aki na serio ora desishonan ta afektá representashon polítiko i futuro di Boneiru. E uso o abuso di poder estatal mester keda suheta na evaluashon legal, responsabilidat i respet pa derechonan fundamental.

E derechonan fundamental i aspirashonnan di e pueblo di Boneiru mester ta sentral den tur desishon ku ta trata di su futuro polítiko. Na mesun momento, polítikonan lokal mester pone e interes komun di e pueblo riba nan agenda personal I partidista, defendiendo derechonan demokrátiko di forma konsistente, tambe ora un otro isla ruman ta afektá.

E pueblo no mester bira solamente un observadó pasivo mientras autoridatnan polítiko ta determiná nan futuro tras di porta sera. Habitantenan tin derecho di haña transparensia tokante e bishita parlamentario, e personanan ku ta wordu konsultá, e temanan ku ta wordu diskutí i e konklushonnan di e komishon.

E eksperensia di Sint Eustatius ta mustra pakiko solidaridat ta importante: lidernan polítiko di Boneiru mester defendé e derechonan demokrátiko di nan propio pueblo i tuma posishon kontra intervenshonan ku ta debilitá e derechonan di otro islanan ruman.

Transparensia ta un elemento esensial di gobernashon demokrátiko. E derechonan, bos i aspirashonnan legítimo di e pueblo di Boneiru mester keda sentral den tur desishon ku ta trata di su isla.

FUENTE: JAMES FINIES