HULANDA A SKAPA SELIBON

Kralendijk,- Un biaha mas pueblo di Boneiru por a eksperensha ku Clark Abraham ta suak komo lider i suak komo mandatario. Un frakaso total. No pasobra Clark no por, pero mas ainda pasobra Clark Abraham su problema ta ku e ta hunga sabi riba tur kos pero no por solushona nada. 

Masha komedia Diputado Clark Abraham a hunga dilanti komunidat i trahadonan di SELIBON, finalmente e no a regla nada i Hulanda a disidi di solushona e problema Hulanda mes.

Nos di oposishon a purba tur manera pa Boneiru mes keda ku e honor di por a solushona e problema. Pero koalishon bou di liderasgo di Clark Abraham a disidi di keda hunga komedia i awe nos tur por a mira un biaha mas ku Clark no por solushona net net nada.

Un berguensa total pa gobernashon lokal di Boneiru. Nos tin kompronde ku na Hulanda un reporte a remarka ku Diputado Clark Abraham su gobiernu ta prefera di kumpra tereno ku sen di pueblo enbes di solushona problemanan serio den komunidat.

E reportero tin tur rason. Pasobra Boneiru mes tabatin sen pa solushona e problema di SELIBON. Pero e gobiernu a skohe pa kumpra tereno ku sen di pueblo. Otro kos ku oposishon a bisa ta ku mester ahusta preis.

Diputado Clark Abraham einan tambe a bari tur konseho di oposishon for di mesa. Awe ata Hulanda a obliga Diputado Clark Abraham pa ahusta preisnan.

Pueblo saka bo som, mientras gobiernu di Boneiru su prioridat ta pa kumpra terenonan grandi ku bo sen I gasta bo sen, mayan abo komo pueblo tin di paga e preis pa e mal gobernashon aki.

FUENTE: PABLO KROON FRAKSHON UPB KONSEHO INSULAR BONEIRU