Redakshon
Kralendijk,-Union Patriotiko Boneriano (UPB) ta presentá un vishon nobo pa mantenshon i embeyesementu di Boneiru. Ku e plan di “Boneiru bunita i bèrdè” e partido ta opta pa un aserkamentu fundamentalmente diferente for di esun tradishonal di timnan temporal di kòrta i snui.
En bes di akshonnan isolá ku hopi bia ta atendé solamente un parti di un problema, UPB ke introdusí un plan di maneho integral. Boneiru lo haña un kantidat di zonanan of region manehabel i kada region ta haña su propio persona of kompania responsabel. Mesun “kapploegen” pero organisá di un forma muchu mas miho i efektivo.
E prinsipio básiko ta simpel: ora un área tin un persona of kompania responsabel permanente, responsabilidat ta wòrdu kreá. Komo resultado, e enfoke no ta solamente riba respondé na mantenshon atrasá, pero riba traha strukturalmente pa un ambiente di bida limpi, sigur i atraktivo.
Den kada kompartimentu, e paisahe di kaya en general i e kalidat di e espasio públiko ta wòrdu analisá. E plan pues ta enserá muchu mas ku djis e snuimentu di palu i mata.
E personanan, kompanianan of timnan responsabel lo enfoká riba diferente trabou di mantenshon i embeyesimentu di Boneiru. Entre otro, mantené kayanan, asera i espasio públiko limpi, barimentu di kaminda i kitamentu di shushi, snuimentu di ramanan i mata ku ta kologá pa mehorá seguridat den tráfiko, mantenshon i plantamentu di mata berde permanente, etsetera. Tur esaki ku e meta pa mehorá e aparensia di distritonan i barionan, atende ku espasionan públiko neglishá i krea un ambiente di biba seif, bon kuidá i atraktivo.
FUENTE: JOLINDA CRAANE/LIVE99FM
GIPHY App Key not set. Please check settings