CAFT ARUBA: “HASI ESKOHONAN TOKANTE DI TURISMO AWOR KU E PRESUPUESTO TA PERMITÍ”

Oranjestad – Kolegio di supervishon finansiero di Aruba (CAft) ta konsehá Gobièrnu di Aruba pa hasi un eskoho fundamental tokante di e futuro di turismo i pa inkorporá e eskoho aki integralmente den e presupuesto, e agènda multianual di invershon i e regulashonnan fiskal. E ekonomia di Aruba ta asina entrelasá ku turismo ku e eskoho aki lo afektá tur minister. Turismo ta e motor prinsipal di kresementu ekonómiko, pero na mes momentu e ta e riesgo di mas grandi pa e sostenibilidat di finansa públiko.

Situashon finansiero ekonómiko

For di un perspektiva ekonómiko, Aruba ainda ta bayendo bon, ounke e kresementu ta nivelando despues di vários aña di rekuperashon fuerte di turismo. E último añanan, e ratio di debe di e sektor kolektivo a baha fuertemente te 64 porshento na 2025. E resultado di eksplotashon i e resultado di e pais ta keda positivo. Aruba ta sumamente vulnerabel pa shòknan ekonómiko; na aña 2020, por ehèmpel, Aruba tabata un di e ekonomianan mas afektá. E situashon ekonómiko mundial insierto i e embehesimentu di poblashon ta e riesgonan prinsipal pa finansa públiko.

Turismo: motor i riesgo

Pa hopi aña kaba, turismo ta e motor prinsipal di e ekonomia di Aruba. E último 20 aña, e aktividat turístiko praktikamente a dòbel. Kresementu kontinuá di e kantidat di turista ta yegando na límitenan, límitenan ku por persibí kaba. Tin un défisit struktural riba merkado laboral, e sektor di utilidat ta yegando na su límite di kapasidat, tin tur biaha mas aglomerashon den tráfiko, i mas i mas preshon riba e merkado di bibienda. E opstákulo no ta e falta di plannan, sino e implementashon di e plannan aki. CAft ta enfatisá ku konsiderando e espasio finansiero aktual, awor ta e momentu pa invertí i reformá. Presisamente awor ku e preshon riba finansa públiko ainda ta limitá.

Skohe direkshon

CAft ta suprayá e importansia pa Aruba di hasi eskohonan awor. Si e enfoke ta riba atrakshon di mas bishitante, e preshon di turismo riba e pais ta oumentá ainda mas, miéntras si ta enfoká riba e balor pa bishitante i diversifikashon di e ekonomia, por sera e brecha entre kresementu turístiko i kresementu di prosperidat. Den e marko ei, Tourism 3.0 ta un inisio balioso di e diskushon sosial. Establesimentu di institushonnan nobo pa duna forma na e maneho di turismo por opstakulisá maneho di turismo efikas. Establesimentu di fondonan nobo alimentá pa impuestonan aloká por kondusí na fragmentashon di gastunan públiko. Resientemente, Aruba a inisiá e regulashon di akomodashonnan short stay. CAft ta konsiente di e importansia di regulashon efikas i enforsamentu riba e área di maneho aki, i ta konsehá pa duna mas forma na esaki. Huntu ku IMF, Aruba ta eksplorando e remplaso di BBO pa un sistema di btw. E implementashon di un sistema di btw lo kontribuí na e ampliashon di e base pa inkluí e sektor informal.

FUENTE: CAFT/LIVE99FM