KÒRSOU: PRONÓSTIKO SIMAN SANTU 2026

Willemstad,- Servisio Meteorológiko Kòrsou ta antisipá ku durante e wikènt di Siman Santu un airu relativamente mas seku lo drenta e region di islanan ABC.

Yobidanan di ultimo dianan gradualmente lo bira menos intensivo, sin enbargo no ta eksklui un yobida di durashon kòrtiku durante próksimo 24 pa 48 ora.

Entrante djabièrne próksimo Meteo ta spera un wer generalmente seku ku temperaturá máksimo alrededor di 30 pa 31 grado Celsius i minimo alrededor di 24 pa 25 grado Celsius.

Pa lokual ta trata forsa di bientu, esaki lo varia entre 10 pa 15 km/o. Mester tene kuenta ku e forsa di bientu kantu di nos kostanan lo ta un poko mas fuerte.

Kondishon di laman lo ta por lo general trankil te moderá. Den transkurso di wikènt ta premirá un oumento gradual den e forsa di bientu, kual lo resulta den un kondishon di laman por lo general moderá. Pasashi entre Kòrsou i “klein” Kòrsou lo ta un poko mas brutu. Ta bon pa doñonan di boto chiki tene kuenta ku esaki.

Servisio Meteorológiko Kòrsou ta konseha pueblo di Kòrsou pa sigui tur nos pronóstikonan pa bo ta debidamente informá i alabes ta desea  pueblo di Kòrsou felis dianan di Siman Santu.

FUENTE: SERVISIO METEOROLÓGIKO KÒRSOU/LIVE99FM