E SIMAN AKI, POR SIERTO DJAWEPS 27 I DJABIÈRNÈ 28 DI FEBRÜARI MIEMBRONAN DI AFBW TIN E OPORTUNIDAT PA HASI UZO DI NAN DERECHO STATUTARIO PA SKOHE UN DIREKTIVA NOBO.

Kralendijk,- Pa e próksimo periodo di 2025 te ku 2027, pues tres aña. Fuera ku e ta un obligashon statutario e elekshon aki tin un karakter speshal kuné.

E sindikato a krese den e último 5 añanan tantu pa loke ta kompanianan na unda e tin representashon komo na kantidat di miembro. Ku e kresementu aki e trabounan sindikal opviamente a oumentá i e konklushon ta hustifiká ku mester bai na e próksimo nivel di dirigí i guia e sindikato.E miembronan den un reunion general lo mester bai duna un mandato kla na e direktiva pa trese e kambionan nesesario den e statutonan aktual di e sindikato pa asina e sindikato por inisiá e proseso di profeshonalisá e sindikato pa por brinda lo máksimo na servisio na e miembronan.

Ademas mirando e desaroyo sosial-ekonómiko ku Boneiru ta pasando aden, tin tur indikashon ku e sindikato lo sigui krese tantu na kompania komo na miembresia. Nos por a tuma nota di un kampaña fuerte, profeshonal i dirigí internamente ku AFBW a hiba informando den un forma amplio su miembronan a base personal, esta kada un mienbro a risibí e informashon personal.

E elekshon di djaweps i djabierne awor lo bai den un forma elektróniko i ku miembronan unda ku nan ta, esta sea na kas, na trabou, den outo, na Playa, nan por tuma 5 minüt di nan tempu i subi nan telefòn, nan i-phone, nan laptop òf kualkier aparato elektróniko i vota. I si un miembro tin problema ku e votamentu elektróniko, henter dia lo tin hende na kas sindikal di AFBW pa yuda i duna asistensia na tur ku mester di ayudo.

Pues no tin ni por tin ningun ekskusa pa abo ku ta miembro keda sin vota djaweps òf djabièrnè awor. Es mas ta bo deber i responsabilidat pa yuda pone un direktiva ku un sosten ku mas tantu voto posibel. Pues e yamada ta simpel VOTA.

Diálogo Sentral ta boga pa yega na un Akuerdo nobo entre Diálogo Sentral i gobièrnu di Den Haag pa bin ku medidanan struktural pa mehorá e situashon sosial i nos ekonomia den un forma duradero.

Den 2024 a oumentá e kompensashonnan sosial, esta ònderstant  penshun di behes , penshun di viuda(o) i huérfano i e sueldo minimo supstanshalmente.

E trayekto aki a kuminsá den 2021 ku e Akuerdo di Kralendijk ora riba inisiativa di dunadónan di trabou a bin e proposishon pa subi e sueldo minimo den término. Esaki a resultá ku hopi habitante di Boneiru a konosé un oumento di nan entrada.

Diálogo Sentral ta preokupá ku e desaroyonan relashoná ku kosto di bida. Terminashon di e supsidionan riba e tarifanan fiho di koriente i awa ta menasá di eliminá tur e oumento lográ. Esaki ta krea un preshon di inflashon, di moda ku oumentonan di sueldo ta bolbe bira nesesario, kual lo pone operashon di kompanianan bou di preshon.

Diálogo Sentral, ta boga pa den 2025 sera un  Akuerdo nobo. E biaha aki ku un partisipashon aktivo i kompromiso di diferente ministerio. Den e konsulta serio i importante aki, bos di trahadó i su famia ta di gran importansia.

P’esei pa di tantísimo biaha ta hasi un yamada na tur sindikato na Boneiru pa nan djòin via USIBO e mesa di diálogo aki. Ta na e mesa aki e interesnan di e klase trahadó ta ser diskutí i fihá. I si e klase trahadó su representashon no t’ei na mesa esaki por perhudiká e klase trahadó. I no tin apsolutamente nada pa stroba partisipashon di tur sindikato na e mesa di diálogo.

FUENTE: NÒCHI WILLEM/LIVE99FM