LIDERASGO KU VISHON TA ESENSIAL.

Kralendijk,- Tur kos den kreashon ta funshoná den órden. Pa por tin órden mester tin propósito, prinsipionan i reglanan pa por garantisá un funshonamentu optimal.

Nos kurpa ta konsistí di un kabes den kua e sélebre ta habitá kual ta e sentro di komando ku ta liderá e kurpa. Un gobièrnu ta keda apuntá na kabes di un komunidat. Nan primeramente ta responsabel pa stipulá un vishon, ehekutá esaki i kontrolá ku den kada faseta den e komunidat e resultadonan optimalmente.

Un berdadero lider

Un di e karakteristikanan fundamental di un lider komo kabes di un komunidat ta, ku internamente su bida mester ta na òrdu. E mester tin un fundeshi sólido integro di prinsipionan ku e ta mantené su mes na dje i ta dispuesto pa no komprometé esakinan pa nada. Un berdadero lider ta un sirbidor ku no ta spera nada akambio. Su satisfashon mas grandi ta ora ku e mira e otro a mehorá den tur aspekto pa motibu di su servisio i liderasko. P’esei ta esensial pa un lider polítiko su bida personal i su kas ta bon liderá promé ku e asumí e responsabilidat pa liderá un komunidat.  

Kada akshon tin su reakshon

E kondishon prinsipal dikon un hende ta traha ta pa motibu di e salario. E konsekuesia di un luna di trabao pa e trahador ta ku e lo risibí un salario. Pa asina e por kumbri e gastunan finansiero ku eksistensia ta eksigí di dje. Meskos tambe e konsekuensianan di un gobièrnu responsabel ta keda manifestá den e resultadonan indirekto òf direktamente visibel di e desaroyonan den e komunidat ei.

Echo ta revelá e bèrdat mas ku palabrá. Asina tambe ora algu ta aparentá loke ku e no ta, ku tempu e resultadonan mes lo revelá kiko ta real i kiko no.

Un bon ehempel konkreto ta e resultadonan ku a revelá e kondishon interno ku tabatin i ku a kousa e outodestrukshon di e di dos koalishon den e periodo di gobernashon 2023 pa 2027 aki na Boneiru. Ku hopi ambishon i orguyo a inisiá un periodo di gobernashon ku un akuerdo firmá ku sinkenta puntonan di atenshon. Pero bintinuebe luna despues e resultado tabata retiru di sinku diputado, outodestrukshon di e koalishon i niun prueba konkreto di kuantu di e puntonan ei a keda konkretisá.   

Bientu ta invisibel pero su efektonan ta prueba su presensiaAnalisando bèk e inisio di polítika aki na Boneiru te ku e situashon estatal aktual un kos ta sigur, ku e resultado ku lidernan polítiko durante e último ochenta añanan aki a duna ta konsekuensia di e forma kon nan a manehá gobernashon konforme nan kapasidat. Promé e polítikonan

 na Boneiru, tabata imigrantenan negoshante ku a yega aki i a mira e oportunidat kon pa gana konfiansa di e inosentenan pober ku tabata habitá pa generashonnan kaba aki. Sin edukashon i ku un mentalidat kondishoná pa un pasado di sklabitut. 

E pober inosentenan aki impreshoná pa aparensia físiko distinto i bienesnan di e imigrantenan nobo aki a hasi un impakto fuerte riba nan. I investigando historia di polítika aki na Boneiru bo por konkluí ku for di dekada sinkuente bini ariba e pueblo humilde chikitu aki a wòrdu usá pa diferente politikonan ku no por a distinguí sirbi pueblo for di sirbidónan ambishoná i ego personal.

Te ku e dia di awe ainda e karakterístika nan aki ta visibel den algun polítiko.

Nan a dependé di nan rasa, forsa finansiero, edukshon i un karisma seduktor pa alkansá nan ophetivo di yega na poder pa dirigí e isla aki konforme nan ambishon personal.

Banda di esei hopi polítiko tabatin problemanan ku otro, problemanan personal i problemanan ku diferente tiponan di adikshon. Boneiru nunka ainda tabatin un lider ku a skucha of stimulá e pueblo pa realmente deskribí pa nan mes kiko nan ta desea i ki direkshon nan kier bai.

Pa asina por a formula un vishon pa futuro di e isla. A laga polítikonan no integro disfrutá di tur benefisionan ku e posishonnan aki a ofresé, perkurá pa nan personalmente i famia keda bon pará i hasi un desaster pa ku atministrashon finansiero  di nos isla te na e momentu ku nan a bira mayornan di edat i atrobe manipulá e inosentenan pa nan sigui kere ku sèmper nos mester keda dependiente.

 

FUENTE: NOËL JOHN JANGA