SRA. TAFILA JANGA SEKRETARIO PA ASUNTUNAN DI BONEIRU

Kralendijk,- Dia 28 di yüni 2024 ABVO, konforme statuto, a organisá elekshon pa eligí un direktiva nobo pa e siguiente periodo di 3 aña (2024-2027).

Riba e mesun fecha miembronan na Boneiru, den un forma direkto, por a skohe un kandidato pa asumí e puesto di sekretario pa asuntunan di Boneiru den direktiva di ABVO.  

Sra. Tafila Janga i  a keda eligí pa asumí e puesto di sekretario pa Boneiru.

Dia 22 di novèmber 2024  sra. Tafila Janga a keda ofisialmente instalá den e direktiva nobo di ABVO ku e funshon di sekretario pa asuntunan di Boneiru. Banda di su funshon komo sekretario pa asuntunan di Boneiru e ta enkargá tambe ku e tareanan di presidente pa ABVO-Bonairu.

Sra. Tafila Janga su plan primordial ta pa krea lidernan sindikal kapas dor di regularmente organisá kurso i charlanan den kuadro di formashon pa su miembronan. Ku e logro aki ABVO-Bonairu kier sigui fortifiká su direktiva na Boneiru i balorá su miembronan.

Pa e próksimo aña ABVO-Bonairu lo kontinuá ku reorganisashon di e gruponan di servisio. Den e luna di novèmber ABVO-Bonairu a logra organisá elekshon pa skohe miembronan pa e direktiva di e grupo di servisio na BIA. E plan ta pa na tur servisio ABVO lo tin un  grupo di servisio ku nan propio representante di grupo. Na yanüari 2025 lo reorganisá grupo di servisio na AKSESO i FKPD.

Entrante yanüari 2025 ofisina na sede di ABVO lo ta abri di djaluna te ku djabièrnè for di 9.00 te ku 12.00 i di 14:00 te ku 17:00or pa miembronan.

FUENTE:ABVO BONAIRE/LIVE99FM