ENTREGÁ ARTÍKULONAN DI PLÈSTIK, KOMBATÍ POLUSHON I GANA PREMIO!

Kralendijk,- Djadumingu awor dia 8 di desèmber Kooyman, Fun Miles, Fuse, Miles4Plastic i HR Groep ta uni forsa pa organisá e promé #beatplasticpollution na Boneiru.

E kampaña aki ta enfoká riba un Boneiru limpi i tei pa enkurashá komunidat boneriano pa durante algun siman kolektá artíkulonan di plèstik i òf aluminium (ALU, PET, HDPE i PP), i entregá  esaki  pa gana diferente  premio.  

Riba djadumingu dia 8 di desèmber 2024 tur hende por entregá  nan  artíkulonan di  plèstik òf bleki di aluminio na Kooyman, entre 9 or i 12 or di mèrdia. Pa kada 50 artíkulo di plèstik i òf aluminium (òf mas) entregá, lo duna  e oportunidat di drei e wil di Fun Miles pa gana premionan manera  gift cards di Kooyman, Punto i ‘gadgets’ di Fun Miles, premio di Van den Tweel i un premio grandi sorpresa.

Tur  partner  ta entusiasmá ku e proyekto aki i ta kompartí e mesun meta; enkurashá resiklahe i hasiendo esaki tene Boneiru limpi. Loke ta hasi  e proyekto  aki aún  mas spesial  ta ku diferente  kolega   di  kada   un   di  e kompanianan lo  tei presente  pa   yuda komo boluntario i di e forma  aki duna un man na e grandioso evento.

E filosofia di #beatplasticpollution ta pa no  solamente kolektá  artíkulo  di  plèstik, pero tambe konsientisá riba e uso di esaki diariamente. Kooyman, Fun Miles, Fuse, Miles4Plastic i HR Groep ta invitá komunidat boneriano lokal pa djadumingu awor pone mannan huntu i kolektá mas tantu artíkulonan di plèstik  posibel.

FUENTE: KOOYMAN/LIVE99FM