RESIENTEMENTE OUTORNAN ELSMARIE BEUKENBOOM I DELNO TROMP A BISHITÁ KÒRSOU I ARUBA PA ENTREGÁ BUKI DI QUINGO FLAMINGO NA DIFERENTE INSTANSIA I PERSONA. 

Kralendijk,- Asina a entregá algun ehemplar na Biblioteka Nashonal di Kòrsou, Museo Mongui Maduro i na Gobernador di Kòrsou. 

Na Aruba nan a entregá algun ehemplar di Quingo Flamingo na Promé Minister di Aruba señor Mike Eman, na Biblioteca Nacional di Aruba, na Archivo Nacional, na Caribiana, Fundacion di Corectornan i Fundacion Lanta Papiamento.   

E buki Quingo Flamingo ta un storia pa mucha. Un flamingo ku yama Quingo. Quingo ke bula bai leu. E ta bula bai Kòrsou promé, na Kòrsou e ta topa ku un lora ku ta bis’é ku na Kòrsou tin un grupo di flamingo ta biba den e saliña di San Wilibròdu.  

E ta bula pa mira si e por topa ku nan pa e sera amistat ku otro flamingo. Nan ta kont’é di e isla bisiña Aruba i Quingo ta disidí di bula bai Aruba. Na Aruba e ta bira amigu ku nan Choko, Patrishi i Caskabel. 

E buki ta edukativo i ta duna mas informashon tokante tur e bestianan menshoná den dje. 

Cargill tabata e finansiadó mayó di e buki Quingo Flamingo skirbí pa Elsmarie Beukenboom i Delno Tromp. 

FUENTE: DELNO L. A. TROMP/LIVE99FM