KONTRÒL DIRIGÍ RIBA HÓREKA I TRÙK DI PAN NA BONEIRU: 13 NEGOSHI SIN PÈRMIT BÁLIDO

Kralendijk – Den luna di mart 2026 Direktorado di Supervishon i Mantenshon di Lei a tene vários kontròl dirigí na diferente negoshi di bibida i hóreka, snèkbar, restorant i trùk di pan mobil na Boneiru.

E kontròlnan a tuma lugá prinsipalmente den oranan di anochi i den wikènt, pa motibu ku for di sierto señalnan ta resultá ku algun di e negoshinan ta aktivo pafó di oranan regular di ofisina. Durante e kontròlnan akí a kontrolá riba poseshon di un pèrmit bálido, manera ta obligatorio konforme artíkulo 3 di e Ordenansa di Bibida i Hóreka Boneiru.

En total nan a kontrolá 46 negoshi. Na 13 negoshi a resultá ku nan no tabata disponé di un pèrmit bálido òf ku nan dokumentashon no tabata na òrdu. Durante e kontròlnan nan a konstatá tambe ku tin ora empresarionan no tin un pèrmit di eksplotashon, nan no por mustra dokumentunan obligatorio, nan ta desviá di e sitio òf e aktividatnan ku tin den nan pèrmit òf nan no ta kumpli ku e kondishonnan mará na nan pèrmit.

E direktorado a tuma medida di mantenshon di lei kontra e negoshinan ku tabata den violashon, entre otro den sierto kasonan un paro temporal di nan operashon empresarial. A hala atenshon di e empresarionan i a pidi nan pa mas pronto posibel sòru pa nan pèrmit ta na òrdu.

Direktorado di Supervishon i Mantenshon di Lei ta enfatisá ku kumplimentu ku regla ta obligatorio. E reglanan akí t’ei pa protehá siguridat, salú públiko, higiena i un imágen di kaya bon kuidá. E direktorado ta hasi un yamada riba e empresarionan pa kontrolá tur pèrmit na tempu i pa prolongá esakinan, i pa kumpli ku e kondishonnan pa evitá medida.

Den e periodo binidero tambe Direktorado di Supervishon i Mantenshon di Lei ta sigui kontrolá aktivamente riba aktividatnan pa kua un pèrmit ta obligatorio den e sektor di hóreka i benta riba kaya. Den kaso di violashon nan ta aktua konforme e leinan i reglanan vigente.

Ku e manera di aktua akí, Direktorado di Supervishon i Mantenshon di Lei ta traha pa logra un komunidat seif, hustu i salú na Boneiru.   

FUENTE: OLB/LIVE99FM

NEDERLANDS:

GERICHTE CONTROLES HORECA EN FOODTRUCKS OP BONAIRE: 13 BEDRIJVEN ZONDER GELDIGE VERGUNNING

Kralendijk –In de maand maart 2026 heeft de Directie Toezicht en Handhaving (DTH) gerichte controles uitgevoerd bij diverse drank- en horecabedrijven, snackbars, restaurants en mobiele foodtrucks op Bonaire.

De controles vonden voornamelijk plaats in de avonduren en weekenden, omdat uit signalen blijkt dat een deel van de bedrijven buiten reguliere kantooruren actief is. Daarbij is gecontroleerd op het bezit van een geldige vergunning, zoals verplicht volgens artikel 3 van de Drank- en Horecaverordening Bonaire.

In totaal zijn 46 bedrijven gecontroleerd. Bij 13 bedrijven bleek dat zij niet beschikten over een geldige vergunning of dat hun documentatie niet op orde was. Tijdens de controles is ook vastgesteld dat ondernemers soms geen exploitatievergunning hebben, verplichte documenten niet kunnen tonen, afwijken van de vergunde locatie of activiteiten, of zich niet houden aan de voorwaarden die aan hun vergunning zijn verbonden.

Tegen overtredende bedrijven zijn handhavingsmaatregelen genomen, waaronder in sommige gevallen een tijdelijke stopzetting van de bedrijfsvoering. Ondernemers zijn aangesproken en verzocht hun vergunningen zo snel mogelijk in orde te maken.

DTH benadrukt dat naleving van de regels verplicht is. Deze regels zijn er om de veiligheid, volksgezondheid, hygiëne en een verzorgd straatbeeld te beschermen. Ondernemers worden opgeroepen hun vergunningen tijdig te controleren en te verlengen, en zich aan de voorwaarden te houden om maatregelen te voorkomen.

DTH blijft ook in de komende periode actief controleren op vergunningplichtige activiteiten binnen de horeca- en ventsector. Bij overtredingen wordt opgetreden volgens de geldende wet- en regelgeving.

Met deze inzet werkt DTH aan een veilige, eerlijke en gezonde gemeenschap op Bonaire.