LADRONISIA, MALESANAN I PLAGANAN TA TORMENTA KUNUKIERONAN, PERO E PÈST MORTAL I DI MAS PELIGROSO TA WEB.

Kralendijk,- Den un komikado di prensa Yonchi Dortalina, propietario di un plantashon hydroponiko ta mustra su desgustu pa entrega di awa dor di WEB.

Pa di 4 biaha konsekutivo e ta perde tur su kròpslanan pa motibu ku WEB no a trese awa of no a hasi esaki na tempu.

Komo un kunukiero hydroponiko, Dortalina ta planta riba awa i ta depende di awa. E awa mester ta di kalidat haltu i mester kumpli eksaktamente ku e kalidat ku e teknika hydroponiko ta preskirbí. Tambe e mester tin un base konstante. Pues e no por keda varia di kalidat i mester ta hinter aña disponibel na e mesun kalidat.

Awaseru ta di kalidat super bon pero e no ta un faktor konstante. Pues awaseru no ta yobe hinter aña. WEB su awa ta di bon kalidat. No tin duda den esei. Komo ex-direktor di nos laboratorio, nos a test e awa aki pa hopi aña largu. Pesei nos por garantisá i konfia e kalidat di awa di WEB pa 100%. Loke WEB ta karesé di dje ta na kalidat den servisio na nos kunukieronan.

Hopi biaha e kunukiero mester keda roga i hasta kai na rudia pa haña un poko awa. Ora ku kumpra awa bo no tin garantía di risibi esaki na tempu tampoko.

Komo kunukiero ku kier produsi profeshonalmente kuminda salú pa pueblo, nos ta yega na e konklushon ku bo no por konfia entrega di awa di WEB.

WEB ta e motibu di perdidá grandi di kunukieronan ku kier produsí profeshonalmente. Pa di 4 biaha nos ta perde tur nos kosecha.

Nos a hasi tur preparashon pa evita di perde nos berduranan.
Nos a imbertí den bakinan di awa di 2. 3, 6,10, 18 i hasta unu di 40 küp pa por akapará awa pa periodo largu. Te ku awe nos no a logra yena esun di 18 küp laga para ewsun di 40 küp. Bo ta kumpra 54 küp di awa i WEB ta entrega 3 küp so. Bo ta yama kantor di WEB pa puntra pe awa, nan ta zundrabo tambe bisando bo ku bo mester warda. Nos a mustra ku no ta trata di un kunuku normal i ku ta un proyekto nos tin mas di 150 mil den dje inberti, pero kontesta ta ku a manda e petishon pa planta ‘and thats it’. Bo tin ku warda. Nos no por sigurabo ni primintibu nada, bo tin ku warda meskos ku tur otronan. Wel nos a warda te ku tur mata a muri. Nos a logra bende i regalá algún berdura wardando riba awa. Awa no a yega i pa di 4 biaha nos ta pèrde tur kos. Ta for di 6 di oktober nos a kumpra 54 küp di awa na WEB, i te awe 1 di desember nos a risibi solamente 3 küp.

E problema di falta di entrega di awa no ta konta pa mi, sino pa kasi tur kunukiero. Mi ta bisa kasi pasobra tin sierto kunukieronan ku plaka si ta wordu preveligía i ta haña awa na ora ku nan ta desea. E pobernan tin ku warda i sigui warda risibiendo un trato deskriminatorio. No tin interés pa yuda e kunukieronan. Ta verwagt ku kunukieronan mester keda usa awa di pos sin ku a hasi ningún kontrol últimamente pa ku kalidat di e awa di pos. Esaki ta un tarea di LVV i departamento di Salubridat Publiko. E awa di pos djawe no ta esun di den pasado.

Tapamentu di sushi na Kuskus a venená nos awa bou di tera, ta usando hopi kimiko pa limpiesa i higiena domistiko. Tin hopi berput di kas ku no ta kumpli ku reglanan di tankinan sèptiko. Tur esakinan ta motibunan pa gobiernu den e kaso aki LVV i e departamento di Salubridat Publiko, kontrolá e awa di pos ku regularidat.

Loke nos duna nos bestianan ta loke nos ta kome. Si e bebe awa venená, nos ta kome karni venená. Venenu gradualmente ta akumulá den nos kurpa kousando malesa manera entre otro kanser. Pa evitá di venená nos kurpa nos tin ku kuida nos bestianan i dunanan kuminda i awa limpi bebe. WEB ta hunga un ròl den esaki i no ta kumpliendo ku esaki debidamente.

Nos a aserka gobiernu, den e kaso aki diputado Abraham pa mira si nos por haña un solushon pa entrega di awa na nos kunukieronan. Asina aki no por sigui. Regi’s Farm pa di 4 biaha siguí ta pèrde 1400 kabes di lechuga. Lo no dura muchu ku WEB lo pone nos bati bankarota.

No tin ningún instansia responsabel pa yuda karga ningún gastu di nos kunukieronan.
Ora ku horta nos bestianan i ora ku kacho matanan, e kunukiero semper a pèrdè.
Konseho Insular tin un ròl grandi pa traha lei pa protege e kunukiero.

Lei pa si kacho mata e kunukiero su bestia, e doño tin ku paga pe bestia. Si WEB keda sin trese awa i e kunukiero tin perdidá WEB lo mester kubri esaki. Si ladron horta bo bestia i haña sa ta ken a hasie, e mester paga bek of pone beslag riba su kosnan. Keda prònk i kana hole dushi no ta ayuda e kunukiero ku nada. Komo kunukiero nos kier pidi na nomber di tur kunukiero pa gobiernu i Konseho Insular move nan jangadó, hasi algu pa yuda nos kunukieronan.

FUENTE: BONAIRE EXCLUSIVE SUITES/LIVE99FM