BONEIRU MENSHONÁ DEN REUNION DI FOURTH COMMITTEE – KOMITE SPESIAL DI ASUNTONAN POLITIKO I DESKOLONISASHON DI NASHONAN UNI

Kralendijk,- Riba 6 di Òktober 2025, durante di e Ochenta Sesion di Asamblea General di Naciones Unidas di e Komité Spesial di Asuntunan Polítiko i Deskolonisashon, 4th Committee di Nashonan Uni,

Estadonan Miembronan di Nashonan Uni a menshoná formalmente e situashon di Boneiru, i a hasi un yamada na Nashonan Uni pa eksaminá e akshonan di Reino Hulandes konforme ku Charter di Nashonan Uni.

Na 2:35 p.m., e intervenshon importante aki a tuma lugá durante e diskurso di introdukshon i debate general konhunto riba e tópikonan di deskolonisashon, spesífikamente riba e punto di agenda tokante Aktividatnan ekonómiko i otro aktividatnan ku ta afektá e interesnan di pueblonan  di Teritorionan Sin Propio Gobernashon.

E intervenshon aki a tuma lugá den presensia di H.E. Annalena Baerbock, Presidente di e Ochenta Seshon di Asamblea General,  Embahadora Menissa Rambally, Presidente di e Komité Spesial pa Deskolonisashon (C-24); e Mishón Permanente di Reino Hulandes; tur Estadonan Miembro di Nashonan Uni,  i representantenan di Bonaire Human Rights Organization ku tabata presente den sala di e Komité.

E Organisashon di Derechonan Humano di Boneiru a hunga un rol esensial pa sigura ku e preokupashonan di pueblo Boneriano a yega na e nivel internashonal, reflektando asina su kompromiso kontinuo ku hustisia, igualdat i autodeterminashon pa Boneiru den e marko di Nashonan Uni.

E momentu aki ta marka un paso signifikante dilanti den trese atenshon internashonal riba e situashon di Boneiru i ta pone e isla bao di atenshon i eksaminashon di Nashonan Uni, reafirmando asina derecho di Boneiru na autodeterminashon i igualdat bou di lei internashonal.

FUENTE: BONAIRE HUMAN RIGHTS ORGANIZATION