NA MART 1951 PA MEDIO DI UN DEKRETO REAL A ANUNSIÁ E NASEMENTU DI UN BONEIRU OUTÓNOMO DEN LOKE DESPUES LO BIRA ANTIA ULANDES.

Kralendijk,- Un teritorio ku su propio nivele di gobernashon eskohé demokrátikamente i funshonando komo un estado di derecho.

15 aña despues riba 22 di novèmber 1966, a base di nos konstitushon trahadónan a usa e derecho di organisá nan mes den un sindikato. Un sindikato bou di e nòmber Algemene Federatie van Bonaireaanse Werknemers, AFBW. E derecho aki di trahadónan ta un di e instrumentunan mas fuerte den funshonamentu di un demokrasia den un estado di derecho. Organisashon di trahadónan no solamente tin rekonosementu nashonal, pero tambe internashonal bou di Organisashon Internashonal di Labor, ILO na kua Ulanda(pues Boneiru tambe) a firma pa ta miembro di e tratado ei. Pues ku e obligashon di kumpli ku e resolushonnan laboral ku e organisashon ta preskribí na interes di e klase trahadó i su famia. Bou di e vishon nobo kaminda sindikalismo en general, pero AFBW en partikular ta enfatisá e aserkamentu di koperashon, di diálogo i  AFBW a bin ta krese supstanshalmente tantu na miembresia komo na kompanianan ku a sera un CAO ku AFBW.

Banda di atraé mas miembro i kompania AFBW ta invertí strukuralmente i aktivamente den formashon i profeshonalisashon di su dirigentenan. Durante 3 aña siguí, esta na 2024, 2025 i e aña aki na sèptèmber AFBW ku sosten di FTA i bankete di di abogado Wildeman Legal a trein su shòpstewardnan den derecho laboral básiko, análisis di e realidat sosial-ekonómiko di Boneiru, funshonamentu komo shopsteward, e wes’i lomba di sindikato i téknika i abilidat di negoshá. Esaki pa garantisá i fortifiká kontinuidat i stabilidat di e organisashon. Ku esaki AFBW a amplia su influensha riba e desaroyo sosial-ekonómiko di nos isla. Mas aleu AFBW a sigui desaroyá di tal forma ku na Boneiru, AFBW den e sektor privá ta e sindikato mas grandi representando trahadónan den sektornan di kuido, di industria, di infrastruktua, di komersio, di horeca, di servisio, i vivienda sosial,  miéntras ku AFBW ta hasi un yamada i ta sigui konsientisá trahadónan pa mas sektor buska e kaminda di sindikalismo, entre kual sektor turistiko, sektor di konstrukshon, sektor di vigilansia, sektor di  pakusnan i tambe awor e sektor di limpiesa. Den e sektornan aki tin hopi abuso i eksplotashon ta tumando lugá ku hopi violashon di salú i seguridat di e trahadó. E sindikato a habri su statutonan di tal forma ku tur hende por bira miembro, pues riba un base individual tambe bo por bira miembro. I komo tal AFBW a amplia su servisionan, esta banda di sera kontrakto kolektivo, AFBW ta brinda ayudo huridiko, skibi karta i otro trabounan atministrativo, guia e trahadó i su famia na e instansianan konserní, pero tambe ta buska empresanan ku ta duna rebaho na miembronan di AFBW. Mirando e ampliashon aki i tambe e profeshonalisashon di e organisashon AFBW ta un aktor sentral den e merkado laboral di Boneiru. Komo un sindikato ku e karakter di un Federashon no solamente komo persona individual òf trahadónan kolektivamente den un kompania por bira miembro, sino si tin grupo di trahadó ku kier lanta nan propio sindikato, AFBW lo duna nan asistensia den esei i komo sindikato tambe bo por bira miembro di AFBW. Den Diálogo Sentral, AFBW ta un di e pilarnan fuerte huntu ku SIMABO i NAPB-BES pa ta e BOS di e klase trahadó i su famia pa ta e balansa di e desaroyo sosial-ekonomiko i pa lucha pa e repartishon di e prosperidat di Boneiru bai den un forma hustu, den kual ku tur ku a forma i yuda konstruí e ekonomia duradero, ta partisipá tambe den e frutanan ku e ekonomia ta produsí i asina garantisá un bida digno di e trahadó i su famia. Miéntras na mart di e aña aki Konseho Insular ounke bou di un orden hurídiko nobo ta konmemorá 75 aña, AFBW dia 22 di novèmber awor lo kumpli 60 aña sirbiendo e klase trahadó i su famia. I apesar di tempunan bon i tempunan ménos bon, ta danki na lidernan ku konvikshon, lidernan ku AMOR pa próhimo, lidernan ku boluntat i sakrifisio, pero tambe lidernan ku determinashon a surpasá menasa i estorbonan grandi i hasta a bai será pa sigui karga e bandera di sindikalismo sirbiendo UN SOLO META, INTERES DI E KLASE TRAHADÓ I SU FAMIA. AFBW ta keda ta e bos di esnan vulnerabel den nos komunidat, trahando brùg di UNION sin mira religion, koló polítiko, rasa, desendensia, sekso. Nos gritu pa Igualdat i no deskriminashon  awor mas ku nunka lo zona mas duru i lo no keda na palabra so, sino lo ta kargá ku akshonnan visibel.

“60 aña fuerte – huntu nos ta konstrui e futuro.”

FUENTE: NORWIN NÒCHI WILLEM, KONSEHERO USIBO

 

.