59 AÑA AFBW KON ORGUYOSO E SINDIKATO POR TA, SABIENDO KU SU KO-FUNDADOR EWALD ABDUL KETU BAI TA DUNA TUR LOKE E TIN NA KAPASIDAT.

Kralendijk,- Sabiduria sindikal i konosementu sindikal por a selebrá huntu ku su AFBW e 59 aña aki. Palankanan manera Eric Vlijt i Primu Bernabela ku semper ku palabranan di aliento pa sigui motivá e generashon di awó di e importansia di un sindikato pa t’ei i sali na defensa di e klase trahadó en general i su miembronan en partikular.

Ta dushi pa skucha eks-presidente Mano Doei Humphrey Wout konstatá ku AFBW a resusitá komo un Phoenix for di su propio shinishi i ta pará fuerte riba su pia awe na 2025. Tur honor, rekonosimentu i rèspèt na eks presidentenan Juan Jacobs i Nilco Rollan ku en pas deskanse, kende nan den tempunan difisil a mantené e barku AFBW nabegando i a sirbi e klase trahadó te na momento ku Kreador a manda yama nan. Nan herensia sindikal ku nan a laga atras, semper lo keda den nos memoria.

Na 2019 bou di presidensia di Cherel Kwidama i su promé direktiva, pero tambe e aktual direktiva, sostené pa shopstewardnan na e diferente kompanianan a kuminsá un era di reorganisá e sindikato i poné funshoná riba un nivel mas profeshonal i adaptá na e eksigensianan di tempu.

Speshalmente e echo ku Boneiru a drenta un konstelashon nobo, tabata eksigí pa bin un aserkamentu nobo, fresku di diálogo ku konosementu pa perkurá pa e bos di e klase trahadó ser skuchá i ku e sindikato a logra duna i risibí rèspèt serka su partner, e dunadó di trabou, pero tambe rèspèt i rekonosemento serka henter e komunidat.

Ku e aserkamentu riba e nivel aki nos a mira resultadonan positivo, kaminda AFBW a krese na organisashonnan i tambe na miembresia i komo tal ta e sindikato di mas grandi aktualmente na Boneiru.

Otro fruta di e reorganisashon ta ku a sera un kantidat grandi di CAO i komo cherry riba e bolo e CAO básiko den e sektor di kuido inkluyendo Saba i Statia. Tambe AFBW a konstrui lasonan di amistat sindikal i di koperashon ku sindikatonan na Kòrsou, esta CBV i ABV i FTA na Aruba, All For One na Satia i Suplua na Saba.

AFBW su kontribushon den USIBO i den Diálogo Sentral ta sumamente balioso, miéntras ku a rehubenesé Komishon di Retiro ku dos profeshonal i un suplente. E lista di logronan desde 2019 no ta limitá na loke a keda deskribí aki so, sino e forma di atendé ku miembresia i no miembresia a krea un imahen sumamente positivo di e sindikato. AFBW simplemente a gana rèspèt den komunidat boneriano i pafó.

Na 2024 a kuminsá kònbersá pa hiba AFBW i sindikalismo en general na un nivel mas profeshonal, mirando e kantidat di trabou i ku no por a sigui solamente riba un base boluntario ku un kompensashon simbóliko pa miembronan di direktiva, konseheronan i shopstewardnan.

E promé paso ku a dal den e direkshon aki tabata pa nombra e presidente den funshon di full-time. Ku e paso di hasi e presidente full time a palabrá algun punto mas den e proseso pa hiba AFBW riba un nivel mas profeshonal.

E nivel ku AFBW a alkansá awe na 2025 despues di 6 aña ta eksigí kompromiso di direktiva, di shopstewardnan, di komishonnan pero tambe di tur e mil i piku miembronan pa no solamente mantené e nivel aktual, sino mas importante bai na e siguiente nivel den sindikalismo na Boneiru.

I pa esaki ta un mensahe mi tin pa e aktual direktiva i presidente. Sigui traha na alsa e nivel di funshonamentu di AFBW, fortifiká e solidaridat interno di miembresia ku transparensha di maneho i duna kuenta i rason di uso di fondonan di e organisashon.

Esaki ta krea i fortifiká konfiansa di e miembresia den direktiva. Duna informashon i formashon kontinuo i konsistente, lanta e sentido di ta un famia den kua kada ken ta aportá segun su kapasidat. Organisá aktividatnan ku ta promové solidarismo.

Delegá tareanan i eksigí kompromiso i responsabilisashon di esnan ku tuma tareanan pa ehekutá. I na kaminda pa selebrashon di 60 aña reta miembresia pa hasi dos kos, esta uno traha un himno pa AFBW i pa konmemorá ku 60 aña AFBW.

E di dos reto ta ku kumpliendo 60 aña AFBW su selebrashon ddi diamante a yega ora pa duna e sindikato un nòmber krioyo na Papiamentu.

I pa loke ta e 59 aña ku a selebrá dia 22 último un pabien di kurason i un gradisimentu ku AFBW a dunami e konfiansa pa ta nan konsehero, miembro di honor i negoshadó di kontratonan kolektivo. I ta ku e sosten i e konfiansa aki  e famia di AFBW por ta orguyoso di a sera sigur 25 CAO i ku mas na kaminda, a oumentá supstanshalmente e miembresia i ku ela kuminsá para finansieramente riba su propio pia i ta un ehèmpel pa kompañero sindikatonan aki na Boneiru kon por duna e klase trahadó e lugá ku e meresé den nos komunidat. Pabien i mas pabien.

FUENTE: NÒCHI WILLEM/LIVE99FM