ELEKSHON DIREKTIVA AFBW 2025 -2027

Kralendijk,- Dia 14 di yanüari 2025 lo tuma lugá elekshon pa direktiva di AFBW 2025 – 2027.

E elekshon aki lo sosodé ku papel i pòtlot, durante e reunion general na Jong Bonaire.

E aktual direktiva ku ta sinta a tuma over na 2019 -2020 i a reorganisá i dirigí e sindikato te na aña 2022. Na 2022 tabata tin un elekshon pa direktiva pa tres aña, di 2022 pa 2025 i den e temporada aki a buta e organisashon stabil i sólido.   

E direktiva ku lo wòrdu elegí dia 14 yanüari 2024, lo bai sinta pa tres aña di 2025 pa 2027. Nan lo bai tin e tarea di sigui profeshonalisá AFBW i laga e federashon aki krese den e área sindikal i den tur sektor, konforme su statuto di ta un federashon.

Direktiva mester hiba e organisashon un struktura nobo i futuro brijante.

Aktualmente AFBW ta e sindikato mas grandi na Boneiru ku mas di 800 miembro, repartí den e diferente sektornan, Cargill Salt Bonaire, Bonairiaanse Wegenbouw Maatschappij b.v., Fundashon Cas Boneriano, Fundashon Mariadal, Bonaire Laboratorium n.v., Divi Flamingo Beach Resort, Pensioenfonds Caribisch Nederland, Curoil Bonaire, Telefonia Bonairiano n.v., Kooyman Bonaire b.v., Servisio di Limpiesa di Boneiru, Contour Global Bonaire, Mental Health Caribbean, Primary Care Caribbean, Zorg en Welzijn Groep Bonaire, Stichting Krusada, Delta Security & Hospitality, Dutch Caribbean Air Navigation Service Provider, Asosashon di Transporte General i su Miembronan Individual.

Komishon di Elekshon:

E elekshon benidero ta ser supervisá pa e Komishon di Elekshon 2025, e komishon di elekshon ta forma pa e tres miembronan honra di AFBW. sr. Ewald Abdul komo presidente, sr. Norwin Willem komo sekretario i sr. Eric Vlijt komo miembro di e komishon.

Personanan ku a postulá nan mes pa ku e elekshon di direktiva:

Tin 5 kandidato pa direktiva general, di kual tres ta bai forma e direktiva diario, pa Presidente ta sr. Cherel Kwidama, pa sekretaria ta sra. Catharina van Mannen i pa tesorero ta sra. Miriam Wanga Markiet.   
Pa miembro di direktiva ta sr. Jose Capella i sra. Lilian Soliana.  

Komishon di elekshon kier hasi un yamada sinsero pa tur, pero tur miembro pa bini na e reunion general i na e reunion general aki tuma parti na e votashon pa un direktiva nobo i asina duna e direktiva e forsa di tin e sosten grandi di su miembronan.

Esaki ta hasi e direktiva mas fuerte den negosiashon i sigui lucha pa bo derechonan i sigui mustrabu riba bo debernan. E prueba di esaki ta ku durante e último añanan, AFBW a negoshá i será kontratonan kolektivo (CAO) hopi benefisioso pa su miembronan.

Den tur e CAO- nan miembronan a bai dilanti pa loke ta nan kondishonnan laboral.

Pues no tin ningun motibu pa abo komo miembro keda sin partisipá na e reunion general di dia 14 yanüari 2025.  

FUENTE: DIREKTIVA AFBW/LIVE99FM