E PROBLEMA DI KANDELA NA LÈNTFIL

Kralendijk,- E konferensia di prensa di djasabra 9 di novèmber 2024 a mustra kla ku ta Gezaghèber ta na mando den e problema di kandela na Lèntfil.

Den reunion di konseho Insular di djárason 5 di novèmber 2024 a sali bon kla ku koalishon I diputado Abraham a basha lágrima di krokodel tirando falta riba otro pero nada di un posibel idea kon atendé ku e problema.

E desishon di Tim di Maneho insular riba tereno di krísis ta e mihó desishon ku ta pone Konseho Insular I diputadonan un kanto. Esaki ta nifiká ku Konseho Insular I Kolegio Ehekutivo mester keda alerta pa despues di e krísis trata den Konseho Insular kon a atendé ku e krísis.

Den e konferensia gezaghèber a trese dilanti ku por papia di desabilitá I trese inkietut den komunidat. Tambe a bini dilanti e parti di asistensia for di Hulanda i si bini un plan di investigashon Bonaire lo mester hunga un ròl den e investigashon.

Pueblo no spanta si Hulanda bini ku un instrukshon i pone tur instansia un kanto pa e simpel motibu ku nan no por atendé ku e problema total di Lèntfil. No lubidá ku tin rapòrt di Inspectie Leefomgeving en Transport (ILT), tin ultimatum di Grupo Pro Lagun, KPCN ta trahando duru pa sa ku si tin algu kastigabel a tuma lugá.

Den e kuadro di krísis aki lo ta un bèrgwensa si representantenan di Bonaire asistí na “Sint Maarten Day” dia 11 di novèmber. Pa rèspèt por a delegá dos persona ku ta Grifir i sekretario di OLB. No lubidá ku durante Covid Rei Willem a bai ku fakansi Gresia I e reakshonnan tabata fuerte i Rei mester a pidi despensa .

Awor nos minister presidènt Dick Schoof a posponé su biahe pa konferensia di klima na Bakoe mirando e disturbionan ku a tuma lugá na Amsterdam.  Pa representantenan di pueblo ainda tin mas fiesta pa bai I gana sèn. Nan ta Statia Day dia 16 di e luna aki, Saba Day 6 di dezèmber I konferensia na Hulanda den dezèmber. Pueblo e situashon, di akuerdo ku rapòrt di ILT,  ta grave,  kompleho i mester aktua urgentemente. Ta responsabilidat di Konsehalnan i Kolegio Ehekutivo pa aktua.

FUENTE:ARTHUR SEALY/LIVE99FM