Kralendijk,- Den medionan lokal mi a bin komprondé ku dia 17 di òktober a marka e promé dia Internashonal di Herensia Kultural Inmaterial, manera establesé pa UNESCO durante selebrashon di 20 aña di e Konvenshon di Herensia Kultural Inmaterial na 2023.
Boneiru ta enfoká riba promoshon di herensia kultural inmaterial pa medio di un wèpsait spesial i media sosial.
Herensia kultural inmaterial ta inkluí tradishonnan bibu, manera tradishonnan oral, arte di aktuashon, ritualnan, i konosementu tokante naturalesa i artesania. Aunke frágil, e herensia aki ta hunga un ròl importante den konservá diversidat kultural i promové diálogo kultural. No ta trata di e manifestashonnan kultural so, pero di e konosementu i téknikanan ku ta pasa di generashon pa generashon.
Riba e wèpsait di Patrimonio Kultural Intangibel di Boneiru den sekshon di práktika sosial, ritual i fiesta ta figurá tambe dia di Rincon. E wèpsait ta splika ku no mester mira “Dia di Rincon” komo un simpel enkuentro ku anualmente ta atraé míles di bishitante for di Kórsou i Aruba.
Mester mir’é hopi mas amplio, esta komo un patrimonio kultural intangibel importante di e pueblo di Rincon. E ta reuní hopi elemento di patrimonio kultural intangible manera muzik i kanto, simadan, ekshibishon di kustumbernan boneriano, arte kulinario di ántes, etc.
E wèpsait ta sigui splika ku e festivalnan di kanto krioyo en konekshon ku Dia di Rincon, tantu esun di hende grandi komo esun di mucha, ta elementonan ku riba nan mes kaba por konsiderá komo patrimonio kultural intangibel.
Tin hopi mas aktividat ku ta tuma luga den kuadro di Dia di Rincon i ta kulminá riba e dia akí ku ta 30 di aprél.
For di 2017 si mi no ta herá tur aña promé ku dia di Rincon mi ta saka un komunikado pleitando pa dia di Rincon keda proklamá komo un patrimonio kultural inmaterial òf intangibel manera ta bisa awor. Despues mester sòru pa Dia di Rincon subi riba lista di inventario di patrimonio intangibel kultural ku ta keda manehá pa ‘Kenniscentrum Inmaterieel Erfgoed Nederland’.
Un patrimonio kultural inmaterial riba e lista por èhèmpel ta e ‘tambú’ di Kòrsou, kaha di òrgel i kuentanan di Nanzi. Si esaki keda realisá un di bentahanan ta ku gobièrnu di Boneiru mes por proklamá un dia liber èkstra lokal pa Boneiru sin ku mester bai roga Hulanda pa esaki.
E djaluna liber despues di karnaval por bai bèk atrobe kaminda e ta pertenesé.
Den e inventario pa loke ta trata Boneiru segun areanan di prinsipal di UNESCO ta wòrdu menshoná riba e wèpsait di e Patrimonio Kultural Intangibel di Boneiru entre otro dia di Rincon pero kon leu nos ta? E wèpsait no ta duna un splikashon kon leu nos ta i kiku asina mester hasi pa kuminsá kana e kaminda.
Komo ku e evento di dia di Rincon tin un importansia sosio-kultural fuerte pa e komunidat di Boneiru i ta un fuente di identidat i orguyo, ta un hecho pues, meskos ku otro festividatnan kultural mundialmente, e por wòrdu rekonosé komo herensia inmaterial.
Pa e propósito aki, e pasonan mester keda tumá pa dia di Rincon wòrdu registrá na e Inventario Nashonal di Herensia Kultural Intangibel manera pa años mi ta boga p’é hopi aña kaba òf asta riba e lista di UNESCO pa herensia intangibel manera e wèpsait di Boneiru mes ta indiká.
Djaluna i djamars awor tin reunion di konseho insular di forma opinion i tuma desishon pa trata e presupuesto di Boneiru pa loke ta trata e aña 2025. Athuntu mi ta agregá un moshon pa aselerá e proseso di registrashon di dia di Rincon, sperando ku miembronan di konseho insular por presentá e moshon aki ku segun mi ta na interes general di Boneiru. Den e kuadro aki mi ta manda e komunikado aki pa grifi di konseho insular ku e petishon pa pasa esaki pa tur miembro di konseho insular pa konsiderashon.
FUENTE:WILLEM A. CECILIA/LIVE99FM

GIPHY App Key not set. Please check settings