ARUBA: MEP KIER PA PARLAMENTO TUMA UN ROL MAS ACTIVO DEN E CRISIS DI TURISMO

Oranjestad, 28 di september 2026 – Lider di fraccion di MEP Evelyn Wever-Croes a pidi e presidente di e Comision Permanente di Turismo, señora Arends-Reyes, pa convoca cu urgencia un reunion di comision tocante e estado actual di turismo na Aruba y e preocupacionnan creciente rond di overtourism.

Segun lider di fraccion Evelyn Wever-Croes, turismo ta di importancia crucial pa Aruba, pero na mes momento  ta necesario pa nos mira cu honestidad e limitacionnan di crecimiento.

“E pregunta cu nos mester haci no ta solamente cuanto turista Aruba ainda por atrae, pero principalmente ki modelo di turismo Aruba por carga na largo plaso.”

Fraccion di MEP ta señala cu e crecemento di turismo ta pone mas presion riba nos infrastructura, trafico, espacio publico, naturaleza, maneho di desperdicio y e calidad di bida na Aruba. E desaroyonan aki ta afecta eventualmente tambe e calidad di bida di e ciudadano.

“High value, low impact” di crecemento pa mas balor

MEP ta boga pa un movemento cla den direccion di un modelo di “High Value, Low Impact”: un sector turistico cu ta crea mas balor economico y social, mientras cu ta limita e presion riba nos espacio limita, infrastructura y naturalesa di Aruba.

Pa yega na solucionnan concreto, MEP kier pa Parlamento tuma un rol mas activo den e dialogo cu e sector turistico. Den e peticion na e comision, e fraccion ta pidi pa invita Aruba Tourism Authority (ATA), Aruba Hotel & Tourism Association (AHATA) y Aruba Timeshare Association (ATSA).

Durante e reunion, e fraccion kier discuti, entre otro, con e sector ta evalua e estado actual di turismo, cuanto mas Aruba realmente por carga, cua paso ta necesario pa yega na “High Value, Low Impact” y cua ta e condicionnan necesario pa logra esaki.

Parlamento no por sinta warda mas

Segun Wever-Croes, ta importante pa Parlamento tuma un rol activo den e proceso.“E meta no ta pa punta dede. E meta ta pa, hunto cu e stakeholders, determina unda e limitacionnan ta y cua decisionnan ta necesario pa mantene turismo sano y sostenibel.”

MEP ta enfatisa cu turismo ta un fuente importante di empleo, entrada y espacio pa inversion na Aruba. P’esey mes, segun e fraccion, nos mester evita cu crecemento economico eventualmente ta bay a costo di e calidad di bida di nos ciudadanonan.

“Turismo mester keda un fuente di prosperidad pa Aruba, pero na un manera cu ta laga Aruba tambe agradabel pa biba pa e generacionnan venidero. ‘High Value, Low Impact’ mester ta e punto di salida. MI ta spera cu e presidente di e comision yama e reunionnan aki urgentemente”, Evelyn Wever-Croes a duna di conoce.

FUENTE: PARTIDO MEP ARUBA/LIVE99FM