Redakshon
Kralendijk,- Nos ta di akuerdo ku Aimed 100% i e tin rason di a lanta su bos. Nos ta duna nos sosten kompleto na e posishon ku el a ekspresá durante e programa brunch di radio dia 19 di ougùstùs 2026, tokante e kuentanan di koriente insoportabel ku pueblo di Boneiru ta enfrentá.
Nos polítikonan mester wòrdu tené responsabel.E subida kontinuo di e gastunan di elektrisidat a yega na un punto kaminda hopi hende trahadó simplemente no por sobrebibí mas. Hende ta traha tur dia, paga hür, kumpra kuminda ku ta bira kada biaha mas karu, kuida nan yuinan i famianan di edat avansá, i despues nan ta risibí kuentanan di elektrisidat ku ta kome parti konsiderabel di nan entrada.
Esaki no ta trata simplemente di un kuenta di koriente mas. Ta trata di si famianan trahadó ainda por permití nan mes di biba na Boneiru.
Boneiru tin nuebe miembro di Konseho Insular i tres diputado ku mester representá interesnan i nesesidatnan básiko di pueblo. Nan mester wòrdu tené polítikamente responsabel pa loke nan ta hasi — òf no ta hasi — pa atendé ku e krísis aki.
Unda e akshon urgente ta? Akseso na energia adekuá i pagabel ta wordu rekonose komo esensial pa realisashon di derechonan humano eksistente i pa mantené un nivel di bida digno. Elektrisidat no ta un luho; e ta un nesesidat básiko di bida moderno. Famianan ta dependé di dje pa refrigerashon, kushiná, lus, ventilashon, airco, edukashon, salú, komunikashon i funshonamentu diario di nan kas. Sin embargo, habitantenan komun di Boneiru ta enfrentá kada biaha mas kuentanan di elektrisidat di WEB ku nan simplemente no por paga, poniendo ainda mas preshon riba famianan ku ya ta luchanado ku e kosto haltu di bida.
Manera Aimed korektamente a lansa e pregunta na e polítikonan durante e programma di brunch: “Politikonan ta warda pa hunga politika ku nesesidat di pueblo? Awor elekshon ta na kaminda, ta bai husa esaki pa kampaña pa elekshon?”
E sufrimentu i difikultat di pueblo nunka mester bira un instrumento pa kampaña elektoral. Polítikonan no mester warda te ora elekshon ta serka pa di repente kuminsá papia tokante problemanan ku famianan ta lucha kuné luna tras luna.
E nuebe miembronan di Konseho Insular i tres diputadonan mester kontestá pueblo direktamente:
Dikon a permití e situashon aki yega na un punto asina krítiko solamente algun luna promé ku elekshon? Awor pueblo mester warda promesanan di temporada di elekshon i solushonnan di kampaña pa un problema ku mester tabata atendé hopi tempu kaba mediante gobernashon responsabel?
Responsabilidat di representantenan elegí no ta pa warda te ora elekshon ta serka pa reakshoná riba sufrimentu di pueblo. Nan responsabilidat ta pa respetá, protehá i kumpli ku derechonan i nesesidatnan básiko di poblashon durante henter nan periodo den funshon.
Pueblo tin mester ku politikonan ta rindi kuenta. Pueblo tin mester di koriente pagabel. Pueblo tin mester di akshon, i nan tin mester di dje awor
FUENTE: JAMES FINIES
GIPHY App Key not set. Please check settings