DESPUES DI MAS KU DIES ANJA DI BISHITA NA HULANDA, BONEIRU TA MERESE RESULTADONAN

Kralndijk,- Sr. James Finies, lider di Partido Pueblo Progresivo (PPP), ta pidi kontestanan kla tokante e delegashon ofisial ku resien a biaha pa Hulanda, inkluyendo diputado Dennis Martinus ku a anunsia esaki den media. PPP ke sa ki resultadonan konkreto e bishita lo trese pa atendé pobresa, gastunan di elektrisidat, preisnan di kuminda, bibienda i oportunidatnan pa e pueblo di Boneiru.

Mas ku diez anja di enkuentronan – Unda e resultadonan ta? – Representantenan gubernamental i polítiko di Boneiru a partisipá den kongresonan di VNG na Hulanda durante un periodo di mas ku diez aña. Finies ta kuestioná kiko e bishitanan repetí aki a logra pa e Boneriano komun. Segun PPP, lidernan tras di lidernan un ta remplasa otro i a regresá ku relatonan di e reunionnan, kontaktonan i promesanan, miéntras demasiádo famianan ta sigui lucha pa por kubri nan nesesidatnan básiko.

Presensia na un kongreso, riba su mes, no por wordu presentá komo un logro. PPP ta kere ku e loke ta mustra bon liderazgo ta si bida di e pueblo ta mehorá. Kada delegashon mester tin prioridatnan kla i regresá ku kompromisonan konkreto, plasonan definí i un splikashon di kon e pueblo di Boneiru lo benefisiá.

Pobresa I kosto di bida- PPP ta enfatisa ku redukshon di pobresa mester ta sentral den e diskushonnan di e delegashon. Famianan ku ta lucha pa paga pa kuminda, hür i servisionan básiko tin mester di solushonnan duradero. Aña tras aña, e difikultatnan aki ta keda riba agenda, pero awor e diskushonnan mester tradusí den mehorashonnan ku hende por sinti den nan kas.

Elektrisidat I preisnan di kuminda – Gastunan di elektrisidat ta pone un karga pisá riba hogarnan i negoshinan, miéntras preisnan haltu di kuminda ta laga famianan ku ménos plaka pa otro nesesidatnan. PPP ta argumenta ku permití tarifanan di elektrisidat sigui subi i despues ofresé alivio temporal ta mustra un fayo den gobernashon di largo plaso. Segun Finies, outoridatnan no por permití ku nan maneho i fayonan struktural ta keda krea difikultat pa e pueblo, i despues presentá yudansa di korto plaso komo un logro polítiko pa kontrolá e mesun problema ku nan a yuda krea. E siklo aki ta laga hende luchando pa paga nan kuentanan i wardando e siguiente intervenshon o asina yama ayudo. Boneiru tin mester di plan duradero pa elektrisidat sostenibel, konfiabel i pagabel, ku metanan kla pa baha gastunan i protehá hogarnan kontra aumentonan ku ta keda repetí. Un plan asina mester duna famianan stabilidat finansiero, yuda negoshinan maneha nan gastunan i mehorá e kalidat di bida di e pueblo. PPP ta puntra ta ki kompromisonan konkreto e delegashon lo logra pa energia pagabel i preisnan di produkto alimentisio básiko, i ki ora e kompromisonan ei lo trese alivio duradero.

Bibienda I kondishonan di bida – Bibienda pagabel i kondishonnan digno di bida mester risibí e mesun urgensia. Famianan no mester ta obligá gastá un parti eksesivo di nan entrada solamente pa por tin un kas. PPP ke akshon konkreto pa atendé disponibilidat i preis di bibienda, i e kondishonnan den kua hende ta biba.

Nos studisantenan na Hulanda – Studiantenan Boneriano ku ta studia na Hulanda ta meresé un diálogo serio i sosten práktiko. Enkuentronan ku nan mester yuda formulá maneho tokante edukashon, empleo i oportunidatnan pa regresá kas. PPP ta kere ku e enkuentronan aki mester bai mas leu ku potrèt i palabranan di ánimo. Studiantenan tin mester di un kaminda kla pa kontribuí ku nan konosementu i abilidatnan na e desaroyo di Boneiru.

Kiko e delgashon lo trese bek? – Ora e delegashon regresá, PPP ta pidi pa tin splikashon públiko tokante e kompromisonan ku a wordu logra, ken lo ehekutá nan i ki ora e pueblo por spera resultadonan.

E pueblo di Boneiru no tin mester di un otro festival di palabra. Nan tin mester di resultadonan. Después di añanan di delegashonan i promesanan, nos pueblo ta meresé sa kiko realmente lo kambia den nan bida diario.” PPP ta enfatisá ku diálogo i kolaborashon ku Hulanda mester kondusí na mehorashonan konkreto i signifikativo pa e pueblo di Boneiru.

E pregunta no ta mas ta kuantu reunionan a wordu tené. E pregunta ta: kiko lo kambia pa e pueblo di Boneiru?

FUENTE: SR. JAMES FINIES, LIDER DI PARTIDO PUEBLO PROGRESIVO.