E SIMAN AKI TA E SIMAN KRUSIAL DEN NEGOSASHONNAN PA UN CAO NOBO DEN E SEKTOR DI KUIDO RIBA E ISLANAN BONEIRU, SABA I SINT EUSTATIUS.

Kralendijk,- Un total di 7 instituto den kuido lo ta na mesa ku tres sindikato pa konsultá riba un CAO nobo. Manera ta konosí un di e puntonan kardinal den e CAO nobo aki ta entrodukshon di 36 ora di trabou pa siman komo norma.

36 ora pa siman a keda entrodusi na Hulanda 30 aña pasá, esta na 1997 i aki na Boneiru ela drenta na vigor den RCN i OLB na aña 2022. Tur e institutonan den kuido riba e tres islanan ta risibí nan finansiamentu pa un gran parti di ministerio di VWS.

Ademas tin otro fondonan di sosten pa atendé ku diferente gastunan den e sektor aki. Pa kita tur duda, sindikalismo no ta papia riba sèn ora nos ta papia di entrodukshon di 36 ora. Asuntu di oumento salarial i sigur pa mantené forsa di kompra di trahadónan den kuido ta un kapitulo lòs for di e 36 ora.

Pues e diskushon di prinsipio ta e trahadó su salú, su vitalidat, su produktividat, su balansa entre bida di trabou i bida privá di famia i kas. Na di dos lugá Boneiru, Saba i Statia for di 2010 ta forma parti integral di e struktura estatal den Hulanda den forma di un Entidat Públiko den konstitushon Hulandes. Un Entidat Públiko komparabel ku e otro Entidatnan Públiko manera Provinsia, Munisipio i Waterschappen. Pues konstitushon Hulandes ta konta pa nos tambe.

Nos ta kai bou di e mesun Gobièrnu di Reino na Den Haag ku tur e 11 provinsianan i tur e 405 munisipionan i tur e waterschappen tambe ta kai. Nos ta representá pa e mesun Staten Generaal ku ta formá pa Eerste i Tweede kamer pa kua institutonan nos tambe a i ta vota demokrátikamente.

Artikulo 1 di konstitushon ta dikta ku tur hende ta igual i ku tur hende mester keda tratá igual tambe…punto. Artikulo 132a di e konstitushon ta krea espasio pa komo ku nos ta den region di Caribe, Latino i Sentro Amerika pa apliká lei- i reglanan ku ta konta den Hulanda den un otro forma ku ta kuadra mas ku nos sirkumstansianan.

Pues otro pero nunka ménos. Diferente si pero nunka desigual òf deskriminá. Laga esei ta kla i raspá pa ora ku ta dil ku sindikalismo. Nos no ta negoshá derechonan.

No ta por nada sindikalismo a lucha pa e Bentana Hurídiko ku ta atendé ku deskriminashon i/o rasimo. Su meta ta pa atendé tur loke ta kai bou di trato desigual òf si bo ke pa perkurá pa trato igual pa tur hende. Pues ku e manifestashon di djasabra nos a konfirmá nos posishon kual tin sosten di e sektor, di dunadónan di trabou, di Bestuurscollege di Boneiru di sindikalismo riba Aruba, Korsou Hulanda i Internashonal.

No tin duna ku nos ta konta ku sosten di órganonan manera Defensor di Pueblo, Kolegio di Derechonan Humano, Kordinadó Nashonal kontra rasismo i deskriminashon i otro organisashonnan riba e plataforma internashonal.

Den un palabra Boneriu i e klase trahadó den kuido no ta pará nan so. Pues tur trahadó den kuido mester ta den estado di alerta e siman aki pa spiritualmente i den orashon sostené nan sindiakto, pero alabes ta alerta i kla pa si ta nesesario usa akshonnan sindikal den un forma pasifiko pero disidido pa logra e meta. No ta asuntu mas di ku lo bin 36 ora si òf nò, awor ta e ora pa tuma e desishon di prinsipio di KI DIA I KON.          

Nos tur a komprondé e mensahe kla i raspá, nos ta bai kuida nos trahadónan den sektor di kuido pa nan tambe por sigui kuida nos ku un kuido haltu di kalidat sin ku nan mes ta bira malu.

FUENTE: NORWIN NÒCHI WILLEM, KONSEHERO USIBO