MIENTRAS E PUEBLO TA SUFRI, GOBIÈRNU TA SIGUI KU SU SHOW.

Un mensahe habrí na e pueblo di Boneiru ( skirbi pa MC Janga ) “Un pueblo ku no ta siña for di su pasado, ta kore peliger di perde su futuro.”

Mi no ta un hende ku ta sigui polítika fasil, manera sèmper mi ta bisa “ nos kada un tin ku traha pa nos por kria nos famia “ . Mi tin difikultat pa komprondé polítika. I despues di sigui diferente reunion nan di gobernashon, loke mi ta mira i tende ta konfundí mi mas kada dia.

Komo Boneriano ami ta haña e situashon aki ta hopi prekupante. Tur ta bisa “ Boneiru no merese esaki “, pero tur ta parti di e show, un Circo kompletu. Nos NO ta tende di akshon nan ku lo wòrdu tuma pa drecha e problema nan di pueblo.

I no ta dedika tempu pa tuma akshon. Hopi tempu ta bai den diskushon, konflikto i rekordá otro nan of tira na kara di otro fayo nan di pasado.

Mi mensahe no ta pa ataká ningun persona òf partido.

Mi ta kere ku si nos, komo Boneirianonan, keda ketu, no bisa nada…i No pensa prome ku Vota. Nada lo kambia !!!!! Mi no ta skirbi e mensahe aki komo un polítiko. Mi no ta skirbi den nòmber di ningun partido. Mi ta skirbi komo un Boneiriano ku tin amor profundo pa e isla aki.

Un hende ku a nase aki, a krese aki i ku ke mira su yunan i nietunan por tin e mes oportunidatnan ku nos mayornan a spera pa nos. Mi ta pidi e Boneiriano, abo ku ta biba riba Boneiru i ku por vota, pa pensa.

Pensa bon !!!

Pasobra futuro di Boneiru no ta den man di polítikonan so. Futuro di Boneiru ta tambe den man di e pueblo ku ta skohe ken lo goberná.

Boneiru di ayera

Tabatin un tempu kaminda Boneiru no tabata riku na plaka. Pero e pueblo tabata riku den balornan. Nos mayornan no tabatin hopi kos. No tabatin kasnan grandi. No tabatin lùgo. No tabatin tur e fasilidatnan ku nos tin awe. Pero nan tabatin algu ku ta parse ku awe nos ta pèrde poko poko. Nan tabatin AMOR pa Boneiru. Respèt pa otro, Solidaridat i Honestidat. I e konvikshon ku si tur hende hasi su parti, Boneiru lo sigui avansá. Nan a lanta e isla aki ku nan man nan. Ku nan sodo, ku hopi sakrifisio. No pa nan mes, Sino pa nos. Pa nos por biba un bida mihó.

Awor mi ta puntra:

Nos a sigui biba segun e mes balornan ei? Òf nos a lubidá di unda nos a bini?

Nos himno no ta solamente un kantika

Tur Boneiriano sa nos himno i nos ta kant’é ku orguyo. Pero…

Kuantu di nos a pensa riba loke nos ta kanta? Ora nos kanta:

“Pueblo humilde i sèmper kontentu…”

Nos ta rekordá ku Boneiru a wòrdu lanta riba humildat, respet i union. Ora nos kanta:

“Pa nos kanta den bon armonia…”

Nos himno no ta papia di division ni di lucha pa poder. E ta papia di un pueblo ku ta traha huntu pa Boneiru. I ora nos kanta:

“Laga nos tur komo Boneiriano, uni nos kanto i alsa nos bos…” Esaki no ta solamente un yamada pa pueblo.

E ta tambe un yamada pa tur líder nan i tur hende ku ke drenta den polítika. Pa sirbi Boneiru. No bo propio interes. Pasobra polítika no ta un medio pa benefisio propio. Polítika ta un yamada di sirbishi.

Boneiru mester di union, no divishon

Mi mensage no ta pa kritiká niun hende. Boneiru meresé mas, Mas transparensia, Mas planifikashon, Mas liderarsko. Mas RESPÈT pa pueblo, Mas akshon i ménos show. Pasobra mientras polítikonan ta diskutí… Tin famia nan, tin negoshante nan den nesesidat, ta pagando kosto nan di bida sumamente haltu. Tin hóbennan ku no sa si nan lo por kumpra un kas algun dia, pagando un hür di kas sumamente haltu. Mientras poder ta kambia di un man pa otro… Tin hende ku a pasa aña nan sperando un oportunidat. I esaki ta pone nos pensa. Esaki ta e Boneiru ku nos mayornan a soña p’e ?

OTRO SOÑO KU A KEDA PARÁ DEN TEMPU

Tin algun historia ku no mester di hopi palabra pa toka nos kurason. Nan ta papia pa nan mes. Mi a lesa un karta ku no por laga mi na pas. No pasobra e tabata un karta speshal. Pero pasobra e ta representá e realidad di hopi Boneiriano.

Na su edat di 18 aña, un mucha muhé a entregá su petishon pa un tereno di erfpacht. Manera hopi hóbennan, e tabatin soñonan. El a sigui tur regla ku gobièrnu a pone. El a entregá su petishon i el a warda ku pasenshi. Soño di tin su propio kas, Di forma un famia. Di traha duro pa un mihó futuro.

Pero segun un karta ofisial di Openbaar Lichaam Boneiru ku e ta risibi; tur petishonnan di erfpacht for di 2011 te ku awe ta riba un lista di espera. E mes karta ta bisa ku no tin ningun tereno di erfpacht disponibel na e momentu nan aki.

El a hasi loke gobièrnu a pidi’e pa hasi, El a warda, I e la sigui warda, Un aña, Dos aña. Sinku aña. Dies aña. I despues………..Diesunku aña a pasa. Durante e mes tempu ei, gobiernunan a forma i gobiernunan a bai. Koalishonnan a kibra, Otro koalishon a forma. Promesanan a wòrdu hasi, Otro promesanan a sigui. Pero pa e mucha muhé ei… Nada no a kambia. Su soño ta keda para. Kada aña ku pasa, e soño ei ta bira mas difísil pa alkansá. Tempu ku no lo bolbe bek nunka mas !!! Tin hende lo bisa: “Pero finalmente e dia lo yega. ” NO “ Pasobra tin kos ku tempu no por duna bek. Kuantu Boneiriano ku tabata riba e lista di espera aki a muri sin ku nan soño di tin un propio kas a bira realidat? Ora e mucha muhé aki tabatin 18 aña, probablemente e lo por a hasi un hipotek ku un plazo largu, su gastunan mensual lo tabata mas abou. Su kas lo por tabata kasi pagá awe. Su yunan lo por tabata krese den nan propio kas.

Pero awor……..E mucha muhe aki ta 15 aña mas grandi. Materialnan di konstrukshon a bira hopi mas karu. Prèis di kasnan a subi. Interesnan di hipotek a kambia. Kosto di bida ta mas karu ku nunka. Un soño ku antes tabata parse alkansabel…A bira mas leu ku nunka. Esaki no ta solamente e historia di e mucha muhé aki. Esaki ta e historia di hopi Boneiriano.

Ki futuro nos ta laga pa nos hóbennan?

Tur mayor ke mira su yu progresá. Tur welo/a ke mira su nietunan tin un futuro. Pero kon un hóbèn lo traha un futuro si e oportunidadnan ta sigui pasa bai nan dilanti ?

Kon nos por bisa nos hóbennan keda Boneiru… Si nan no por kumpra un kas? Si nan no por logra un tereno? Si nan ta mira ku e soño ta bira mas difísil kada aña? Nos mester hasi nos mes e preguntanan aki. No pa buska kulpabel. Pero pa buska solushon.

Mientras e pueblo ta warda.. polítika ta sigui Demokrasia ta importante, Diskushon ta importante. Diferensia di opinion tambe ta importante. Pero tin un diferensia grandi entre hasi polítika…I hasi show.

Pueblo no ta sperando pa wak ken lo gana un puesto !! Pueblo ta sperando resultado !! Pueblo no ta kome promesa !! Pueblo no ta paga su fakturanan ku palabranan !! Pueblo no ta lanta su kas ku debate !! Pueblo mester akshon.” Responsabilidat, Desishonnan i Liderasko. Pueblo no tin tempu pa show polítiko. Ora un hóbèn ta perde speransa di tin su propio kas… E no ta interesá den plan nan polítiko, sin resultado. Ora un Boneiriano mester paga Web tur fin di luna, huntu ku koriente i awa ku ta sigui subi, e no tin tempu pa show polítiko. E ta buskando un manera pa sobrebibí. Ora un hende a warda 15 aña pa un tereno… E no kier mas palabranan bunita I di engaño. “ E kier resultado”

Un mensahe pa tur esnan ku ke drenta den polítika Mi ke trese un mesahe pa tur hende ku ta pensa di pone nan nòmber riba un lista elektoral. Prome ku bo hasi esaki… Sinta un ratu den silensio. I puntra bo mes:

“Dikon mi ke drenta den polítika?”

Ta pa sirbi pueblo? Ta pa defendé Boneiru? Ta pa laga un legado ku nos yu i nietunan lo por sinti orguyo di dje? Òf… Ta pa buska benefisio propio? Ta pa buska poder? Ta pa haña un puesto? Ta pa prestígio? Si bo motivashon no ta pa sirbi Boneiru i su pueblo, no drenta den polítika. Pasobra polítika no ta un negoshi. No ta un trampolin pa interes personal. No ta un medio pa yega mas haltu ku otro. Polítika ta un mandato ku pueblo ta duna. Un voto no ta un regalo. Un voto ta un akto di konfiansa. I ora pueblo pone nan konfiansa den bo… Bo tin e obligashon moral di pone interes di Boneiru promé. Un líder berdadero no ta puntra: “Kiko mi por haña?” Un líder berdadero ta puntra: “Kiko mi por duna?” Pasobra na fin di kuenta… Pueblo no lo keda kordá kuantu aña bo tabata na poder. Pueblo lo keda kordá kiko bo a hasi ku e poder ku nan a pone den bo man.

UN MENSAHE PA PUEBLO DI BONEIRU

Den mart 2027, nos lo bai urna atrobe. E bala kòra ku bo pone ei por determiná e rumbo di Boneiru pa e añanan ku ta bin. Ora bo drenta den e kabina di voto… No laga bo desishon wòrdu dominá pa emoshon. No laga bo desishon dependé solamente di un promesa. No laga bo desishon ta basa riba simpatia òf amistad.

Puntra bo mes:

Ken a demostrá ku e ta pone interes di Boneiru promé? Ken a laga echonan papia mas fuerte ku palabranan? Ken a laga integridat guia su desishonnan?

Pasobra voto no ta un premio, Voto ta un responsabilidat !! Kada voto ta un akto di konfiansa ku pueblo ta pone den man di un otro ser humano. I e konfiansa ei mester wòrdu ganá, No kumprá, No heredá.

Ganá !!!!

Boneiru ta mas grandi ku kualke partido Partidonan lo bin, Partidonan lo bai. Gobiernu nan lo forma, Gobiernu nan lo kai. Pero Boneiru……………Boneiru ta keda. Nos kultura tin ku keda, Nos idioma tin ku keda. Nos pueblo ta keda. P’esei, ningun partido mester ta mas grandi ku Boneiru. Ningun líder mester pone su propio interes ariba e interes di pueblo. I ningun puesto mester ta mas importante ku e responsabilidat pa sirbi.

Na esnan ku lo tuma e responsabilidat di liderá nos pueblo!

Si pueblo duna bo nan konfiansa… Protehá esaki !! No lubidá ku bo no ta goberná pa bo mes. Bo ta goberná pa e mucha ku ke un mihó skol. Pa e hóbèn ku ke traha i keda na Boneiru. Pa e famia ku ta soña di un kas propio. Pa e hende grandi ku a dediká nan bida na e isla aki. Ser Lider no ta un privilegio. “ Ta un sakrifisio “ No ta un honor pa bo nòmber. Ta un obligashon pa bo konsenshi. I e dia ku bo no por pone interes di pueblo promé……….Tin balentia i laga e puesto. Pasobra Boneiru semper mester ta promé.

Boneiriano nan… habri boso wowo. No laga palabranan sedusí bo “ Buska echonan” No laga promesanan guia bo “ Buska resultadonan” No sigui hende solamente pasobra nan ta papia bunita “ Skohe lider ku ta sirbi ku humildat, integridat i amor pa Boneiru. I ora bo pone bo bala kòra den mart 2027…Hasi esaki ku bo kurason, Pero tambe ku bo memoria. Pasobra un pueblo ku no siña for di su pasado… “ Ta kore peliger di ripití e mes un erornan.” Boneiru no ta di politiko nan, Boneiru ta di su pueblo.

I futuro di Boneiru ta den man di Kada Boneiriano ku ta usa su voto ku responsabilidat. Normalmente, ora mi ta skirbi un artíkulo òf un opinion, mi no sa pone mi nòmber. Pero e biaha aki, mi ta skohe pa pone mi nomber bou di e mensahe aki. Mi tin sigur ku hopi di boso lo pensa: “Oh oh… kiko a pasa ku esaki?” No pasobra mi ta buska atenshon. No pasobra mi ta buska konflikto. Pero mi ta kere ku a yega e momentu pa nos, komo Boneirianonan, halsa nos bos. Laga sa ku nos NO ta kontentu ku e situashon. Laga nos bos i nos pensamentunan resona, pasobra ora un Boneiriano ta papia for di amor pa su isla i su pueblo, e no mester tin miedu, ni skonde su identidat.. Mi ta spera ku e mensahe aki wòrdu lesá komo un yamada di reflekshon. No komo un atake. I mi kier pa ta kla ku mi no ta skirbi e mensahe aki pa sostené ni pa ataká ningun partido polítiko.

P’esei mi ta pidi respetosamente na tur partido polítiko: no bishitá mi i no buska mi voto na mart 2027. Mi voto NO lo dependé di un bishita, un promesa òf un kampaña. Mi voto lo dependé di echonan, integridat i loke a wòrdu hasi pa Boneiru i su pueblo. Boneiriano nan… habri boso wowo, Pa nos isla, Pa nos pueblo, Pa nos futuro.

Skirbi pa MC Janga

FUENTE:LIVE99FM