LANSAMENTU PROGRAMA 2026: SÍRKULO DI HERMANDAT DI FUNDASHON VIBRA

Kralendijk – Fundashon Vibra den kolaborashon ku Terramar Museum ta orguyoso di presentá su programashon di 2026, un serie di enkuentro pa muhé, kaminda reflekshon, konekshon i kresementu personal para sentral.

E Sírkulo di Hermandat ta sigui krea un espasio seif, habrí, sin huisio i inklusivo, kaminda muhénan por bin huntu pa papia tokante tema ku ta toka nan bida: amor, límite personal, identidat, ambishon i bienestar.

E enkuentro ta invita muhé pa no solamente skucha pero pa partisipá aktivamente, kompartí i rekonosé nan propio historia.

Ku e programa di 2026, Fundashon Vibra ta amplia e inisiativa, ku mas momento pa enkuentro, mas tema relevante i mas oportunidat pa muhé den komunidat di Boneiru pa konektá ku otro i ku nan mes.

22 di aprel – Ami ta di aki i abo? Un kòmbersashon tokante kultura, kiko ta hasi ami òf abo Boneriano? 27 di mei – Amor di famia. Un kòmbersashon tokante famia, responsabilidat, kustumber di famia i nesesidat pa kustumber nobo.

24 di yüni – E ròl di hende muhé den peska Boneriano. 26 di ougùstùs – Rais ku memoria, desendiente di ken bo ta?

Un kòmbersashon tokante loke e muhé ku tabata tei promé ku bo a hasi pa awe bo ta e hende ku bo ta. 30 di sèptèmber –

Mi stèm, un kòmbersashon tokante e presensia i e influensia di e hende muhé den e komunidat di Boneiru. 28 di òktober – Ritmo di bida, un kòmbersashon tokante tempu i e preshon mental i e ekspektativa ku nos komunidat tin pa hende muhé i mucha muhé den nos komunidat. 25 di novèmber – Dignidat i seguridat; un kòmbersashon tokante protekshon di e hende muhé, su balor i su dignidat.

Orario : 18:30 pa 20:30 Lugá: Terramar Museum, Kaya Isla Riba 3 Por registrá via e formulario online (kada luna tin unu) Pa pregunta por kontaktá na +599 7854399 / konekta@vibrabonaire.com

E evento ta basa riba e prinsipio “paga lo ke bo por”, pa sigurá ku kada hende tin chèns pa partisipá. E idioma ta Papiamentu i e evento ta eksklusivo pa muhé. Ku e lansamentu aki, Fundashon Vibra i Terramar Museum ta reafirmá nan kompromiso pa sigui fortifiká muhé den komunidat, krea espasio di diálogo i kontribuí na un futuro kaminda stèm di muhé ta skucha i balorá.

FUENTE: TERRAMAR MUSEUM/LIVE99FM