NEKRO-DISKUSHON

Kralendijk,- Na Bonaire ta diskutí  tantu na radio, televishon, korant komo riba medionan sosial. Tópikonan ta pobresa, kareteranan malu, bibienda popular pagabel, subida di preis, enseñansa, papiamentu, deporte, turismo, ekonomia, polítika, siguridat sosial, problema di kabritu, buriku, klima, nutrishon, pasado di sklabitut, lèntfel, struktura estatal, herensia kultural i medio ambiente.

Base di e diskushonnan ta diskriminashon, kolonialismo i outonomia. Loke ta tuma lugá ta “nekro-diskushon’ den kombinashon ku “nekro-polítika” E palabra nekro ta  bon mirá nekrologia ku ta nifiká biografia di un persona morto.

Den e kaso aki ta trata di tópikonan ku ta morto den nos komunidat. Ehèmpel di nekro – polítika ta e lès ku sekretario di estado Eric van de Burg a splika na Bonaire ku polítiko i no- polítikonan no por duna òrdu na ámtenarnan i ku mester kòrda ku pueblo ta skohe su representantenan, nuebe i na mart 2027 diesun.Nan ta vota riba personanan pa bira diputado.

Ku otro palabra ta frega  den nos kara ku nos no sa  esensia di votashon ni funshonamentu di demokrasia. Por kompará fásilmente komunidat boneriano komo un kampo kaminda ta interná hende ku un nivel abou kontrolá pa podernan aheno.

Ta un realidat ku e status di Bonaire ta “Dependensia” di tantu Hulanda komo Aruba i Kòrsou. E debilidat di bonerianonan ta bira visibel na momentu ku no ke ta parti di Hulanda, pero ke restorá kolonia Antia bou di diferente nòmber pa laga pasa ta algu nobo.

Solushon ta enseñansa komo motor di desaroyo riba kaminda pa kibra ku dependensia pa logra igualdat.

Ehèmpel ta lucha di personanan den kuido pa 36 ora di trabou. Ta un lucha pa konosementu interno ken bo ta i ku ta hende. Nada di konosé istoria i blabla.

Bonerianonan ta envolví na nasementu di Bonaire nobo den un struktura otro ku esun di Antia. No por bai bèk mas.

Relashon ku otro islanan di kolonia hulandes ta “Door of no return”

FUENTE: ARTHUR SEALY .