MI KIER KUMINSÁ NA FELISITÁ SHÒPSTEWARDNAN I MIEMBRONAN DI AFBW, SPESHALMENTE DEN E SEKTOR DI KUIDO.

Kralendijk,- No a keda den kamber será ta gruña ku otro pa loke ta nan eksigensia hustu pa entrodusí 36 ora di trabou pa siman komo norma a base di dos prinsipio fundamental, esta IGUALDAT I KUIDO DI KALIDAT I DURADERO.

Igualdat pasobra nos ta parti di Ulanda i mester kumpli ku e dos leinan den e konstitushon, esta artikulo 1 i 132a, pero tambe ku artikulo 20. Pa esaki no mester di ningun investigashon e ta un DERECHO…punto. E di dos prinsipio ta kuido di kalidat i duradero.

E prinsipio aki tin di haber ku e HENDE ku ta pará kla 24/7 pa duna kuido na tur hende, for di Rei Willem Alexander te na e hende grandinan i  esnan deshabilitá ku no por pèrkurá pa nan mes mas. Loke nan ta pidi awor ta KUIDA NAN pa nan por sigui kuida nos.

Nan ta pidi pa tene kuenta ku nan salú ku ta bou di preshon di trabou. Nan ta pidi pa tene kuenta ku nan tambe tin kasá i yu, esta un famia ku meresé nan atenshon, kariño i amor ku hopi bes nan no ta haña pasobra papa o mama tin ku sigui traha òf ta yama papa òf mama pa bin traha den su oranan di sosiego.

I ta pa esakinan e trahadónan den kuido a sali for di den e kamber será i subi kaya i hasi nan lucha visibel i mas ku tur kos komprendibel pa henter e komunidat.

Nan a manifestá den kurá di AFBW, nan a bai Konseho Insular i informá e 9 miembronan di e Konseho Insular, nan a bai na un hotèl konosí kaminda e delegashon di Komishon Fiho kier a reuni den sekreto i a hala na atenshon komo nos representantenan na Ulanda.

Esaki a kousa un tiki molèster pa e empresa, pero ta esei ta hala atenshon pa e lucha hustifiká. I sa ku e huespetnan den e empresa ei a elogiá e kurashi i balentia di esnan den akshon, ya ku pa nan den nan pais ta algu ku ta tuma lugá diariamente.

Lanta para pa bo derechonan ta parti fundamental di un funshonamentu sano demokrátiko den un estado di derecho.

I tanten ku no por presentá argumentunan hustifiká ku no por entrodusí 36 ora, manera a hasiele na Ulanda 30 aña pasá i manera a hasiele aki na RCN, OLB na 2023, akshonnan sindikal lo sigui i oumentá i nos tin sigur ku mas ku 90% di pueblo boneriano ta sostené e trahadónan aki.

Pueblo a i ta realisá ku ora nan mes òf kualkier relashon di nan bira malu òf ta malu, ki importante ta pa tin hende ku konosementu, pero alabes hende salú pará na kama di nan mes òf nan ser kerí dunando 24/7 máksimo atenshon i kuido.

Pero alabes nan ta realisá ora e kuido aki bai atras pa motibu di kansansio, di preshon, di burnout o kualkier motibu ku ta afektá e salú fisiko i mental di e trahadó pará na e kama ei kiko esaki ta nifiká.

Sindikalismo responsabel a demonstrá ku nos t’ei pa e dignidat humano promé ku nos papia di oumentu di salario òf traha ménos.

I si no yega na un solushon, AFBW a i ta atvertí ku e lucha aki por ekspandé. E no ta un menasa pero prinsipio di solidaridat laboral ta pone ku mas sektor lo lanta i sostené  norma di 36 ora.

Pues laga nos atendé e transishon aki kuminsando na Konseho Insular pa dekretá ku 36 ora lo ta e norma di un trabou full time pa siman.

I depues sindikalismo i dunadónan di trabou den diálogo sano, manera nos a bin ta hasi esaki ya pa sigur 10 aña lo buska e akuerdo a base di kada sektor su sirkumstansia pa entrodusí e norma aki sea den un tiro òf den fase.

Na mesa nos lo yega na otro i nos a  demonstrá esaki kaba ku e Akuerdo di Kralendijk.

Un biaha mas a keda demonstrá tambe ku derecho bo no ta hañele di regalo ni bo no por usa organisashonnan eksterno pa primi pa hañele.

Ta bo mes ku tin e derecho ankrá i rekonosé den lei- i tratadonan internashonal ku ta konta pabo direktamente i ku ta mas haltu ku nos leinan nashonal, mester sali lanta para den UNION  i logra.

Ta den e UNION nos forsa i sigur forsa di e klase trahadó ta i bo ta duna balor na bo derecho. Otro manera e ta bira hasi i duna fabor, privilegiá un riba e otro, krea divishon i sigui oprimí, abusá i eksplotá e klase trahadó.

Ta e strategia universal ku ta usa pa tene e trahadó pober, ignorante i hasiele kompletamente dependiente.

E forsa di e UNION sindikal ta pa krea e balansa entre derecho i obligashonnan di tantu e trahadó komo e dunadó di trabou.

Sin sindikalismo e ta bira un relashon entre un trahadó individual i un organisashon ku ta disponé di mas poder, medionan i konosementu hurídiko.

Un sindikalismo fuerte den UNION no ta pa gana e dunadó di trabou pero ta un lucha pa un balansa hustu den kua partidonan por ehersé nan derechonan i kumpli ku nan obligashonnan.

Esaki ta ser partner na mesa a base di rèspèt i rekonosementu pa otro, pero mas importante a base di igualdat.

Sindikalismo fuerte ta konstruí brùg i no muraya; Igualdat na mesa, huntu pa progreso.”

FUENTE: NORWIN NÒCHI WILLEM, KONSEHERO USIBO