Redakshon
Kralendijk,- Durante un selebrashon eksitoso di su 65 aña di edat, tené djasabra último, Sr. James Kroon a informá tur presente ku e a baha anteriormente komo lider polítiko.
No opstante, el a kontinuá sirbi den funshon komo lider interino pa garantisá e kontinuidat i stabilidat di e partido.
Awor ku el a alkansá e edat di 65 aña, Sr. James Kroon ta konsiderá ku a yega e momentu apropríá pa tuma e siguiente paso den konsulta i kooperashon ku su partido.
E paso aki ta enfoká riba e preparashon di un siguiente lider di UPB ku lo asumí e responsabilidat di liderato.
Ofisialmente, Sr. James Kroon a kuminsá e proseso pa fasilitá un transishon ordená, ku ta permití e partido selebrá i instalá un lider nobo.
El a enfatisá ku el lo keda polítikamente aktivo i lo sigui sostené e partido, aunke no mas den e kapasidat di lider di partido.
Tambe e a deklará ku, komo eks-lider, el lo ta kla pa brindá sosten i asesoria kompleto na e lider nobo. Sr. Kroon a ekspresá su gradisimentu profundo na e públiko pa nan añanan di sosten, i a hasi un yamada na tur miembro i simpatizante pa sigui sostené e lider nobo, pasobra “huntu nos ta forma e partido”.
Na nòmber di e partido UPB, Sr. James Kroon a wordu entregá un plaka di rekonosimentu pa su añanan di dedikashon, kuminsando na 1989. Ademas, el a wordu nombra komo miembro honorario di e partido.
FUENTE: UPB/LIVE99FM
GIPHY App Key not set. Please check settings