KORSOU: FINAL DI TEMPORADA DI ORKAN 2025

Willemstad,- Temporada di Orkan Atlántiko 2025 a terminá ofisialmente dia 30 di novèmber 2025. Tantu Colorado State University (CSU) komo e Atministrashon Nashonal di Oséano i Atmósfera (NOAA) na Merka a pronostika e temporada anteriormente komo potensialmente riba promedio.

Esaki tabata basa debí na temperaturanan di superfisie di laman eksepshonalmente haltu  i kondishonnan atmosfériko faborabel den Osean Atlantiko. Den práktika, sin embargo, e temporada a produsí ménos tormenta ku a pronostiká.

E prome inkidashon ta mustra ku un faktor klave ku a limitá e kantidat di tormentanan ku nòmber tabata presensia di aire seku riba Atlántiko Nort tropikal i konvekshon redusí riba Afrika Oksidental. Esei a stroba desaroyo di olanan tropikal trempan. Aktualmente tantu  CSU komo NOAA ta analisando e data pa bini ku un aklarashon.

No opstante  e kantidat e limita  esnan ku a forma tabata remarkablemente intenso i tabatin un impakto global signifikante.

E temporada a wòrdu dominá pa tres orkan sumamente potente, inkluyendo Orkan Melissa, ku a bira un di e orkannan den Region Atlántiko mas fuerte registrá.

A pesar di ekspektativanan riba promedio, e temporada tabata mas trankil ku a antisipá:

•  13 tormenta ku nòmber (mas abou ku pronostiká) (12 normal)

•  5 orkan (4)

•  4 orkan intenso

Orkan Melissa a forma dia 21 di òktober 2025, for di un ola tropikal riba parti ost di Karibe.

Rápidamente el a desaroyá den un orkan poderoso debí na:

•  Awa di laman eksepshonalmente kalor (>29–30°C)

•  Diferensia den velosisat di bientu

•  Konvekshon fuertemente organisá

Melissa a alkansá forsa di kategoria 5, ku velosidat di bientu promedio mas fuerte, ku ta surpasá 280 km/ora i un preshon di aire den su sentro bou di 900 hPa, hasiendo esaki un di e orkannan di Region Atlántiko mas poderoso ku a yega di wòrdu registrá.

Pa Kòrsou, e aña a keda sin ningun pasashi direkto di orkan, pero tòg e isla a konosé impaktonan meteorológiko i di laman signifikativo. E ola tropikal ku a forma i bira Orkan Melissa djis wèst di Kòrsou  a trese hopi áwaseru ku a tuma e desishon pa sera skolnan pe siguiente dia. I dianan ku a sigui laman brutu a daña nos playanan na parti wèst.  

1. Ola tropikal ku áwaseru pisá

Den e di dos mitar di e temporada, un ola tropikal aktivo, ku djis despues a bira Melissa, a move ku bastante áwaseru a traves di parti nortwèst di nos isla.

Konsekuensia:

• Lokalmente mas ku 100 mm di áwaseru a kai na parti nortwèst (Bándabou) denter di 24 ora
• Inundashon lokal den áreanan abou i seramentu di kaminda
• Inundashon den mondinan i saturashon temporal di damnan

2. Olanan kousá dor di Orkan Melissa

E resake potente generá dor di Melissa a yega Kòrsou a pesar di e distansia basta grandi.

Impakto na Kosta:

• Eroshon visibel di kosta na vários playa na kosta wèst i sùitwèst
• Playanan temporalmente a bira mas smal
• Oumento di akshon di ola a daña algun fasilidat serka di e liña di awa
• Eroshon aselerá den áreanan di playa vulnerabel

3. Relevansia pa Evaluashon di Riesgo den Futuro

Esaki ta suprayá ku Kòrsou:

• por eksperensiá interupshonnan hasta sin un menasa direkto di orkan
• ta keda vulnerabel pa resake, áwaseru, olanan tropikal, i e impakto di orkannan leu for di nos kosta
• ta benefisiá di monitoreo kontinuo di sistemanan ku ta desaroyá basta leu for di nos isla

Temporada di Orkan di Atlántiko 2025 a resultá di ta un ehèmpel kla di un aña den kua e kantidat di tormenta ta ménos importante ku nan intensidat. Ounke a spera mas tormenta, ku kuater orkan intenso i un intensidat rèkert, 2025 tabata tòg un temporada energétikamente severo.

Pa Kòrsou (na rant di e trayekto direkto di orkannan), 2025 tabata un otro demostrashon di kon efektonan indirekto, manera olanan tropikal, áwaseru pisá, i resake, por tin impaktonan lokal signifikante ainda. Orkan Melissa, e tormenta mas poderoso di e temporada, a laga un marka kla riba e zonanan na kosta sùitwèst i wèst di e isla, via di olanan brutu.

E temporada ta konfirmá e importansia di monitoreo estrecho, vigilansia regional, i un bista mas amplio di riesgonan di orkan, spesialmente pa e islanan den parti sùit di Área di Karibe.

Servisio Meteorológiko Kòrsou (Meteo Kòrsou), komo servisio nashonal di wer, ta responsabel pa vigilá e wer kontinuamente, analisá desaroyonan atmosfériko den nos region, i emití atvertensia i konseho na tempu na públiko.

Mas aleu Meteo a emiti varios alerta spesifikamente pa nos espasio aereo, tumando na kuenta e kantidat di avionan ku ta krusa nos area. Esaki ta wòrdu hasí pa garantisá seguridat di poblashon, negoshinan, infrastruktura vital i sektor di aviashon. E servisio a kumpli ku e responsabilidat aki ku hopi kuidou durante di Temporada di Orkan 2025.

Pa medio di aktualisashonnan regular, atvertensia marítimo, i mensahenan spesífiko di impakto, e públiko tabata wòrdu informá konsistentemente i adekuadamente tokante olanan tropikal, oumento di chèns di presipitashon, i olanan generá dor di orkannan leu, manera Melissa. Esaki a permití siudadanonan, instansianan gubernamental i servisio di emergensia pa antisipá riesgonan potensial na tempu.

Servisio Meteorológiko Kòrsou ta sigui vigila situashon di tempu 24/7.

FUENTE: SERVISIO METEOROLOGIKO KORSOU/LIVE99FM