TIN BASTA KU DESIGUALDAT.

Kralendijk,- Oradónan Mr dr Glenn Thodé i Mr Reinier van Zutphen,  ombudsman nashonal, durante e konferensia organisá pa kordinadó nashonal kontra rasismo i diskriminashon a mustra, ku nos mester kibra ku e sistema di dependensia.

Glenn, mucha di Playa Pabou, a base di un kuenta a ilustrá ku nos kurpa ta den e struktura nobo pero nos spiritu ainda ta den e sistema bieu ku yama  Antia Hulandes.

Tambe mester pone un fin na nos propio diskriminashon ku ta bon kabei i mal kabei.  Ombudsman a enfatisá ku Bonaire ta igual ku Hulanda, nada di “gelijkwaardig” i papia solamente di comply nada di “explain”. A base di igualdat mi a trese durante e seshon tokante enseñasa ku Bonaire mester di un universidat, supsidiá pa gobièrnu hulandes meskos ku ta e kaso na Hulanda. Esaki ta igualdat. Nada di “dependance” di otro universidat ku ta nifiká dependensia.

Nos ta Karibe pues mester por studia lei, historia, geografia, sosiologia, filosofia, sikologia, antropologia, kriminologia di Bonaire i Karibe  ku profesornan boneriano i di den region. Mi tin basta ku e argumentonan fofo, ku no por, no tin sufisiente material, loke no ta bèrdat, no tin dosente, mester sa hulandes pa bo progresá i wie betaalt bepaalt.

Ken tin e kurashi di kuminsá un skol na papiamentu manera defuntu Frank Martinus Arion. Hulanda a pidi diskulpa i pordon awèl bin Kralendijk. Shonnan tin basta ku zundramentu ku Hulanda, ta diskriminá,  ta kolonial i ta rasista lubidando ku nos ta diskriminá nos mes hendenan.

Ta bini un instansia na Bonaire kaminda por trese keho dilanti kontra diskriminashon. Awèl mi ta enkurashá tur strañero bibá na Bonaire pa duna keho pa motibu ku ta diskriminá nan yamando nan ; latino, chino, makamba.  Lo mi apresiá si un hende di Playa kuminsá un kaso kontra ami ku ta diskriminá ora mi papia di  “Shon blanku di Playa” 

 

FUENTE: ARTHUR SEALY/LIVE99FM