SIMPOSIO PA PROMOSHON DI LESAMENTU I DESAROYO DI IDIOMA.

Kralendijk,- Dos dia di simposio ‘Promoshon di lesamentu komo fundeshi pa desaroyo di idioma na Boneiru’, tabata un éksito. Tur partisipante a haña hopi informashon kon pa sigui yuda desaroyá i stimulá nos muchanan pa lesa i skibi.

Durante promé dia di e simposio, kuater oradó a hiba palabra. Señora Evelien van Dort ta eskritor i dosente. Su presentashon i tayer a trata un aserkamentu inovativo pa motivá lesamentu i skibimentu di buki. Señora Ria Geerse ta dosente penshonado di Hogeschool Utrecht.

Ria su presentashon i tayer a bai tokante e importansia di un huki di buki kombiná ku huki di skibi den klas. Tur dos persona ta bini for di Hulanda i nan presentashon tabata na Hulandes.

Señora Xiomara Frans-Muller eskritor i dosente su presentashon i tayer  a bai tokante material pa siña Papiamentu tantu na skolnan básiko komo skol sekundario. E último presentashon i tayer tabata na enkargo di señora Monica Clarinda, dosente i eskritor. Su presentashon a bai tokante su eksperensia komo dosente ku ta stimulá muchanan pa haña plaser den lesamentu.

Tambe weganan edukativo pa stimulá lesamentu serka muchanan di 6 te ku 10 aña. Xiomara i Monica a duna nan presentashon na Papiamentu.

Partisipantenan riba e promé dia tabata eskritornan, koordinadó di idioma, profeshonalnan den enseñansa i profeshonalnan den área di promoshon di lektura. Riba e di dos dia tabata pa mayornan i lidernan di Sentro di kuido pa mucha.

Na fin di e promé dia nos fundashon a entregá premio di ‘huki di buki mas atraktivo den klas’ na yùf Marjolein Coffy-Kroon di ISK Rincon. Mireille Joseph, representante di Biblioteka Públiko a hasi entregá di e premio. Riba e di dos dia nos a entregá premionan na muchanan ku a partisipá den e tayer kon pa skibi kreativo.

Un katidat di sinku skol básiko a partisipá i for di kada skol a saka un ganadó. Nos por bisa ku e antusiasmo tabata enorme serka e muchanan, nan mayor i nan maestronan.

Presidente di nos fundashon, Mazarella Jansen, a habri e simposio splikando presentenan tur e trabounan ku FLTD tin ta hasiendo durante e 12 aña i mei di eksistensia. Direktiva ta yama masha danki na Timoteo Silberie, hefe di SKAL, pa hiba palabra na tur presente riba e promé dia i Nina den Heyer komo mayor a hiba palabra riba e di dos dia. Boso palabranan a duna tur presente un indikashon kuantu balor e  simposio aki tin pa nos komunidat Boneriano.

Un enorme danki ta bai na OLB i Biblioteka Públiko di Boneiru ku a finansiá e simposio. Danki tambe na Akademia Papiamentu ku a kubri gastunan di entrada p’asina tur partisipante por a partisipá grátis.

Direktiva di FLTD ta gradisí tur persona ku a partisipá i yuda tambe ku realisashon di e dos dianan aki.

Nos ta sumamente agradesido!

Ta huntu nos por logra un bon futuro pa nos muchanan di Boneiru.

FUENTE: DIREKTIVA DI FUNDASHON LESA TA DUSHI/LIVE99FM