BIA I ABVO A FIRMA AKUERDO PA PROLONGASHON DI CAO

Kralendijk,- AWE BIA N.V. i ABVO a firma un akuerdo pa prolongá e aktual Kontrato Kolektivo di Trabou (CAO) te ku 31 di desèmber 2026.

E prolongashon lo drenta na vigor dia 1 di yanüari 2026.

Konsiderando e desaroyonan mundial den e merkado laboral di aviashon, BIA N.V. ta realisando un sondeo den e sektor di aviashon pa evaluá, entre otro, su maneho di personal. Basá riba esaki, BIA a proponé pa prolongá e CAO te ku desèmber 2026.

E proseso di negoshashon a tuma su tempu nesesario. ABVO, komo sindikato responsabel, a konsulta regularmente i intensamente ku su miembronan. Direktiva di ABVO konhuntamente ku  e grupo di servisio ku ta representá e empleadonan a haña sufisiente tempu pa deliberá tokante e proposishon di ámbos partido promé ku a disidí pa firma e akuerdo.

Empleadonan di BIA NV a haña un adelanto signifikante segun forsa di e kompania.

Pa loke ta trata e sistema di evaluashon i kompensashon,aki tambe a bini un kambio den e sistema di balorashon ku ta un avanse pa e empleadonan di BIA NV.

BIA ta planifiká pa reevaluá e struktura di suèldu durante aña 2026, ku meta pa mehora e proseso di rekonosementu i kompensashon pa su empleadonan.

ABVO ta ekspresá su apresio na tur empleado ku a kontribuí na realisashon i e logronan di e akuerdo aki. Un kaloroso pabien tambe ta bai na e grupo di servisio di  BIA pa nan esfuerso durante e proseso di negoshashon. Na unda nos por mustra kon e miembresia a subi mas ku 100% den e periodo di 2024 pa 2025.

FUENTE: ABVO BONAIRE/LIVE99FM