KOALISHON ABESTRUS

Kralendijk,- Frakshon di UPB ku hopi atenshon a sigui e presentashon ku Selibon N.V. a hasi durante di e reunion di Komishon Fiho di Espasio i Desaroyo (R&O) ku a wordu realisá dia 25 di sèptèmber 2025 den sala di reunion di Pasangrahan.

A tuma nota di e seriedat di e situashon ku Selibon N.V. ta pasando aden i ku sin un inyekshon finansiero urgente di parti di doño di Selibon N.V., ku ta Entidat Públiko Boneiru, Selibon lo no por sigui garantisá servisio di rekohé i prosesá sushi na komunidat di Boneiru.

A base di e situashon serio di Selibon, frakshon di UPB a hasi e proposishon na final di e mesun reunion pa yama un reunion públiko. Despues di a konsultá ku presidente di e Komishon Fiho di R&O, señor Cyrill Vrolijk, a disidí na e mesun momentu, na final di reunion, pa pidi un reunion urgente pa dia 1 di òktober 2025. E motibu tabata ku señor Vrolijk mester bai di biahe dia 2 di òktober 2025.

Sorpresivamente por a lesa den medionan sosial ku señora Daisy Coffie a laga sa ku lider di frakshon di UPB no a konsultá ku koalishon promé ku a disidí na yama e reunion urgente pa dia 1 di òktober 2025. Esaki sigur no ta kuadra ku realidat, pasobra lider di frakshon di UPB debidament a komuniká i konsultá ku presidente di e Komishon Fiho di R&O, pasobra ta señor Vrolijk ta dirigi reunionnan di Komishon Fiho di R&O i no señora Coffie.

Señora Coffie a tuma riba su mes pa dirigi e koalishon manera ku e ta haña ku ta bon, pues si su persona a disidí ku e no por atendé reunion, anto henter koalishon mester obedesé señora Coffie. Pues, di esaki por dedusí ku señora Coffie ta lider di koalishon, pues sobranan mester sigui su òrdu sino fono.

Mientras ku ta nenga di a atendé e reunion dia 1 di òktober 2025 a base di arogansia, poder i negligensia pa realisá ku Eilandsraad mester bin huntu pa atendé e problema serio di Selibon, na Hulanda ta pasa moshonnan den Tweede Kamer pa sera e landfill na Lagun i tambe pa inisiá un investigashon pa un instansha imparshál riba e problemátika di Selibon. Esaki, danki na Koalishon ku ta wordu dirigi pa señora Daisy Coffie ku ta aplikando politika di abestrus.

Koalishon ta sigui kometé blunder tras di blunder. Koalishon, a base di arogansia, poder i terkedat, a vota kontra di moshon di UPB pa tene e selebrashon protokolar dia 6 di sèptèmber 2025 i no dia 5. Preshon i rosea di pueblo di Boneiru a pone e Koalishon dal paso atrás i bek manera kangreu.

Awor ta bolbe kometé otro blunder: keda sin atendé un reunion públiko ekstraordinario ku tin relashon ku e situashon di urgensia di Selibon.

Mientras tanto, ya kaba ta konosí ku Tweede Kamer na Hulanda ta sigui aktua, pasobra e Koalishon i Gobiernu di Boneiru ta inkapas pa demostrá madures polítiko i pa atendé e problema agudo di Selibon. Koalishon mester realisá ku no por apliká politika di abestrus ku asuntonan serio di Boneiru. Koalishon i Gobiernu tin dos aña kaba na mando, pero ta skohe pa sigui tira tur falta riba e gobiernu anterior.

E reunion di Konseho Insular pa atendé asuntonan di Selibon ku Koalishon a boikoteá dia 1 di òktober 2025, lo kontinua ku of sin kórum djárason dia 7 di òktober 2025 pa 4.00 or di atardi.

FUENTE: BENITO DIRKSZ LÍDER DI FRAKSHON DI UPB DEN KONSEHO INSULAR