Redakshon
Kralendijk,- Problemanan ku no solamente ta di karakter di posishon huridiko di e dosente i personal, pero ku eksplísitamente tin di haber ku sirkumstansianan laboral, seguridat na trabou i komportashonnan intolerabel i inakseptabel.
Banda di esaki ta hibando un maneho di rekurso humano ku ta krea hopi inkietut i inseguridat bou di e personal. Den e aña eskolar ku ta transkuriendo aki ya kaba tabatin dos konfrontashon serio entre gerensia i personal di Komunidat di Skol pa motibu di e maneho di personal.
Tambe tin un konfrontashon ta vislumbrando na e direktiva di skol katóliko tambe pa e maneho di personal. Nos no kier papia mes den e problemanan ku tin den e sektor di akohida di mucha despues di skol i krèshnan. Finalmente ta keda aspektonan di kontenido di enseñansa. Ku ta afektá e base di enseñansa komo e instrumento pa ekselensia pa konstruí un formashon dirigí riba nos merkado laboral lokal.
Sindikalismo ta kere ku a yega ora pa un reflekshon nashonal di tur envolví ku un aserkamentu di abou bai ariba i no di ariba bai abou. E tres pilarnan mas importante ku lo tin ku karga e vishon aki ta indudablemente e triángulo formá pa dosentenan, mayornan i alumno/studiantenan. E asina yamá tres M-nan, esta Mucha, Maestro i Mayor.
I pa logra ku e partidonan envolví entre kua ministerio di enseñansa, inspekshon i otronan ta move, nos mester di un sindikato fuerte, ku vishon i ku ta akshoná. Un sindikato ta fuerte si e ta kargá pa miembronan responsabel, aktivo i konsiente di nan balor i ku un dosis grandi di outorèspèt i asina eksigí rèspèt, rekonosimentu i balorashon di otronan pa e profeshon di dosente/maestro.
Komo ko-fundadó den 1980 di e sindikato SIMABO huntu ku otro dosentenan ya penshoná, mi kier apesar di mi edat haltu hasi esfuerso pa pone e sindikato resusitá for di su shinishinan i profilá su mes komo un sindikato moderno, ko-responsabel pa un desaroyo sólido i duradero riba tereno di enseñansa na servisio di e desaroyo general sosial-ekonómiko di Boneiru i ku ta sali den un forma disidido pa interesnan laboral di e personal den e sektor kompleto di enseñansa i edukashon.
Pa tal rason lo aserká kada un di boso riba un base personal i direkt ku e petishon i invitashon pa un anochi informativo. Un anochi informativo di durashon kòrtiku, pero ku e meta kla i raspá pa logra haña bo sosten pa duna bida nobo na SIMABO. Bo sosten ta ku riba término kòrtiku logra forma un direktiva di trabou konsistiendo di tur sektor, esta enseñansa primario, enseñansa sekundario ku tur su departamentunan, enseñansa di fishi, pero tambe akohida di mucha i krèshnan.
Den dianan ku ta bin lo bo risibí un formulario di interes pa e proyekto aki pa yena i mi ta konta ku bo koperashon, tambe un yamada na mi koleganan penshonado ku ainda ta sinti ku nan por duna un aporte ku konseho of un otro forma. Dosente i maestro ta arkitektonan i konstruktornan di e generashon nobo.
Ta den nan man futuro i kuné futuro di Boneiru ta. Nan ta duna tur loke nan tin ku AMOR pa nan trabou. Loke nan ta pidi bèk ta rèspèt, rekonosimentu i balorisashon di nan profeshon. I na promé lugá esei mester bin di nan dunadó di trabou. Nan no ta pòpchi ni piesanan riba un telmashin yen di sifra. Nan ta hende ku ta karga minimal 6 pa 8 ora pa dia durante 40 siman pa aña responsabilidat di yunan di otro hende. Pues hamas nan lo por akseptá trato komo sifuera ta un mashin nan ta. Den e kuadro aki mi ta sita dos ekspreshon di Nelson Mandela tokante edukashon.
“Edukashon ta e arma mas poderoso pa usa pa kambia mundo pues pa nos kambia Boneiru pa un rumbo nobo .”
“E poder di edukashon ta ekspandé mas leu ku e abilidatnan ku nos mester pa éksito ekonómiko. E por kontribuí na nation-building i rekonsiliashon”.
FUENTE: NÒCHI WILLEM/LIVE99FM
GIPHY App Key not set. Please check settings