COPPPAL TA HONRA JAMES FINIES I DAVIKA BISSESSAR SHAW KU E MEDAYA DI MERITO “GUSTAVO CARVAJAL MORENO, MENSAHERO DI PAS”

Kralendijk,-  Konferensia Permanente di Partidonan Polítiko di Latinoamérika i Karibe (COPPPAL) a aprobá pa outorgá e Medaya di Merito ‘Gustavo Carvajal Moreno, Mensahero di Pas’ na James Finies i Davika Bissessar Shaw di Organisashon di Derechos Humanos di Boneiru, huntu ku Presidente Luis Abinader di Repúblika Dominikano, Sekretario General di OEA Albert Ramdin, i Rafael Gamundi Cordero, pa nan kompromiso ku pas, demokrasia i derecho humano.

Partidonan polítiko di Latinoamérika i Karibe ta rekonosé nan lucha pasífiko i inkansabel pa derecho di outodeterminashon di e pueblo di Boneiru.

Deklarashon di Alejandro Moreno

Senador Alejandro Moreno, presidente di COPPPAL, a honra e lucha kontinuo ku Finies i Bissessar Shaw ta hibando kontra e kolonialismo ku Hulanda ta kontinua imponé riba Boneiru.

“E rekonosementu pa James i Davika ta yena mi di gran alegria. Nan ta hendenan ku gran kalidat humano, guerreronan ku nunka ta give up. Ku konvikshon i gran kompromiso, nan ta sigui nan lucha pa derecho di outodeterminashon di nan pueblo I eradikashon di e vergonsoso kolonialismo Hulandes. Nan tin tur nos solidaridat i sosten kontinuo di COPPPAL,”

— Alejandro Moreno

Desishon di COPPPAL i Importansia di e Medaya

E Kordinashon General di COPPPAL — un organisashon ku ta uní 75 partido polítiko progresista for di 30 pais — a aprobá unanimemente e proposishon pa duna e rekonosimentu importante aki. E distinkshon lo wordo entregá durante e Reunion Plenario di COPPPAL den novèmber na República Dominicana.

E Medaya di Mérito “Gustavo Carvajal Moreno, Mensahero di Pas” ta e distinkshon di mas haltu ku COPPPAL ta duna. E medaya ta bai na personanan òf institushonan ku a kontribuí den promoshon i difushon di kultura di pas, defensa di demokrasia, i promoshon i protekshon di derechonan humano, tanto na nivel mundial komo partikularmente den Latinoamérika i Karibe.

Homenaje na Gustavo Carvajal Moreno

Alejandro Moreno a indiká ku e premio a wordo instituí komo un homenaje na Gustavo Carvajal Moreno, fundador di COPPPAL. Carvajal Moreno tabata enfoka riba dialógo i konsenso, ku un vishon pa un futuro Latinoamerikano mas liber, hustu, uní, demokratiko i na pas.

Ròl i Mishon di COPPPAL

Fundá na 1979, COPPPAL ta e foro polítiko mas importante pa partidonan polítiko demokratiko den Latinoamérika i Karibe. COPPPAL ta defendé soberania di pueblo, boga pa un órden internashonal mas hustu i ekitativo, i promové unidat Latinoamerikano i Karibeño.

E organisashon ta sostené luchanan pa demokrasia ku ta garantisá partisipashon di mayoria i minoria den desishonan estatal, den un struktura di garantianan legal ku ta protehá libertat públiko, partisipashon polítiko pleno i respet pa diversidat ideológiko.

FUENTE: BONAIRE HUMAN RIGHTS ORGANIZATION