25 DI SÈPTÈMBER 2025 LO BAI DEN HISTORIA KOMO OTRO FECHA, RIBA KUA INSISTENSIA I PERSEVERANSHA DI SINDIKALISMO NA BONEIRU TA MARKA UN KAMBIO PA MIHÓ DEN NOS DESAROYO.

Kralendijk,- Algun aña pasá e preshon konstruktivo di sindikato a pone ku tur gobernante, tur miembro di Konseho Insular, pero tambe tur e órganonan responsabel pa bon gobernashon di kompania a brasa un meta, a mira den un direkshon i a pensa i aktua den union, poniendo un banda e sombra di interes personal i interes di partido i a logra mantené BONLAB habrí i awe funshonando atrobe brindando un variedat di servisio nesesario den kuido di promé liña,

pero tambe servisio na bienestar di nos salubridat públiko en general. For di 2020 ku AFBW a drenta den Selibon ku un aktitut konstruktivo e sindikato apoyá pa e gran mayoria di trahadónan den e kompania a fiha nan meta riba término korto, pero alabes riba término largu.

Riba término korto a bai ku tur konosementu i eksperensha pa drecha e kondishonnan laboral di e trahadónan ku pa años a keda neglishá i maltratá. Awe Selibon tin un CAO den kua e tres prinsipionan básiko di Rèspèt, Rekonosimentu i Rekompensa hustu a keda honrá i ku espasio pa sigui mehorá. Riba término mediano i largu sindikalismo a traha un rapòrt kla i raspá, den kual nos a ilustrá mal maneho finansiero/ekonómiko di e kompania i ku hasta nos a deklará e kompania teknikamente/finansieramente bankarota.

Pero tambe den e mesun rapòrt nos a ilustrá tambe e sirkumstansianan laboral pésimo bou di kua e trahadónan mester a ehersé nan labor di tur dia. Nos a mustra riba e mal estado di e edifisio na Kaya Industria, a mustra riba e falta struktural di un garashi bon ekipá pa garantisá un plan di mantenshon, sumamente importante pa e kompania.

A mustra riba e lokalidat for di òrdu kaminda e trahadónan mester pasa na oranan di deskanso. A mustra riba e situashon peligroso, insigur i insaludabel na Lèntfel na Lagun i na Morotin. Na 2023 trahadónan a bai hasta den akshon pa 4 dia, no pa mas sèn,  sino netamente pa pone preshon pa bin ku un Selibon Nobo ku ta kuadra ku eksigensianan di e tempu i desaroyo di Boneiru pa loke ta rekohé sushi, warda sushi i prosesá sushi.

Tur hende a sera orea, sera wowo i a subi riba e trein di akusá otro den tur sorto di forma, lubidando kada un di wak den spil, esta gerensia di Selibon, hunta di komisario di Selibon, Akshonista di Selibon(BHM), Bestuurscollege di Boneiru i Konseho Insular di Boneiru i realisá ku kada un pero tambe kolektivamente no a karga nan responsabilidat.

Un situashon penoso ku a resultá hasta den intervenshon di Represenante di Reino basá riba e echo ku pa años tur esnan menshoná a neglishá nan tarea.

Den tur esaki ta solamente un aspekto tabata stabil i esei tabata i te ainda ta e trahadó ku apesar di e situashon pésimo aki a sigui kumpli ku su trabou, a demonstrá pasenshi, a koperá pa alargá su Cao ku un aña sin ningun mehorashon, a kore peliger físiko pa traha ku ekiponan totalmente bieu i for di sla i toalmernte afgekeurd, a pone su salú na peliger riba un lèntfel ku produktonan di sushi peligroso, manera asbest, sushi biomédiko i ku radio-actdief sin ningun klase di protekshon.

I esaki a logra solamente i únikamente pa e aktitut profeshonal i responsabel di e sindikato pará huntu ku e trahadó.

Nos tambe a pasa e bèrguensa di intervenshon di representante di Reino, pasobra nos mes no a karga nos responsabilidatnan mará na outogobernashon. Pa tal rason sindikato huntu ku e trahadónan di Selibon a tuma un desishon kla i raspá.

No mas intervenshon di ningun hende i a manda bisa tur envolví ku si nan no pone nan kabes pareu, trahadónan lo pone trabou abou i nos lo mobilisá henter e pueblo, esta tur kas, tur empresa, tur ku ta biba den bisendario di Lagun pa laga komprondé ku awor ta basta ku papia, basta ku plania i ku mester bin akshon pa solushon.

I e solushon pa sindikato i trahadónan ta idéntiko na e tres puntonan di akshon ku Selibon a trese dilanti durante e reunion den Konseho Insular, esta awor  un inyekshon di kapital pa ekipá Selibon di tal forma ku e por hasi su trabou di rekohé, warda i prosesá sushi profeshonal, sigur i saldudabel kompañá pa likidashon di tur debe ku e kompania tin.

I banda di esaki sosten di nos gobernashon, esta di Bestuurscollege ku Konseho Insular pa yega na akuerdo ku tarifanan realistiko pa e servisio ku Selibon ta duna na komunidat i tambe sosten pa por yega na e punto ku ta sera lèntfel pa loke ta deramentu di sushi i ku ta bin ku prosesamentu di sushi den un forma ekonómikamente faktibel ku ta generá entrada pa e kompania i ta deshasí di sushi den un forma safe pa ku salubridat públiko en general i protehá nos medio-ambiente i naturalesa.

E menasa di paro di trabou ta for di mesa awor aki i nos ta karga e konfiansa i speransa ku e intervenshon di sindikalismo lo kondusi na e solushon ku nos tur ta deseá, esta un SELIBON ku ta funshoná finansieramente/ekonómikamente sano pa asina garantisá e servisionan importantisimo ku e mester duna komunidat,  esta un Boneiru limpi i salú pa nos mes komo pueblo i komo e produkto ku nos ta bende internashonalmente pa atraé turista i opviamente komo un garantia di un kompania ku ta krea i brinda kuponan di trabou pa nos hendenan ku perspektivanan pa kresementu i desaroyo di e personal.

E pida outogobernashon aki, sindikalismo lo no laga  entregé pa negligensha i/o falta di kapasidat pa manehá. Aki atrobe nos lema ta nos guia, esta goberná pa sirbi. I aki e gobernashon no ta solamente e aspekto polítiko pero ta henter e kadena ku ta manehá Selibon, esta gerensia, hunta di komisario, akshonista BHM, kolegio ehekutivo i konseho Insular huntu i kada un den su ròl.

FUENTE: NÒCHI WILLEM/LIVE99FM