TREMENDO REUNION NA MESA DI KONSULTA DIANAN 8,9 I 10 DI SÈPTÈMBER ULTIMO

Kralendijk,- Pa atendé puntonan importante den e aktual CAO den sektor di kuido riba islanan Bes i tambe en preparashon pa negosashonnan pa un CAO nobo ku lo mester drenta na vigor 1 di yanüari 2027.

Komo negoshadó na mesa pa e tres sindikatonan AFBW di Boneiru, All for One di Statia i Suplua di Saba, mi kier kuminsá na duna mi rekonosimentu públiko na e forma profeshonal, bon dokumentá ku e komishon tékniko konsistiendo tantu di representantenan sindikal komo di dunadónan di trabou a prepará dokumentonan pa e reunion.

Esaki a pone ku e reunion a kana suave, ku puntonan di bista skèrpi na mesa, pero ku e gran dosis di sentido komun  pa pone interes grandi di kuido dilanti.

Durante e reunion un biaha mas partidonan a rekonfirmá nan posishon ku sektor di kuido ta un sektor super speshal den nos komunidat, Ta trata di hende ku tin ku duna kuido di kalidat na otro hende.

Pa tal rason mester rekonosé i respetá e dunadó di kuido aki den e forma ku su ambiente di trabou, su ekipo i material pa traha kuné ta brindé espasio i seguridat pa duna lo máksimo na kalidat di kuido na e pashènt.

Organisashonnan ku ta dirigí e tsektor di kuido a rekonfirmá tambe ku nan meta no ta meskos ku kualkier empresa esta pa hasi ganashi sino nan tambe tin e obligashon sagrado pa krea e ambiente deksribí pa e kuido ta optimal.

Sifranan den buki ta importante pero e hende ku ta traha i e hende ku ta risibí kuido ta surpasá e sifranan na importansia.

P’esei fuera di e ambiente i sirkumstansia di trabou, e rekompensa di e trahadónan den kuido i nan kondishonnan sekundario meresé kontinuamente atenshon pa asina nan eksperenshá ku ta balorá nan trabou i di e forma ei pone atenshon riba nan vitalidat i energia pa traha.

Mester bisa tambe ku e forma kon sindikalismo di Boneiru, Saba i Statia a fortifiká e lasonan pa logra kosnan grandi den e sektor ta trahando manera un magneet.

Diferente organisashonnan den kuido ta mustrando interes serio pa uni na e mesa di konsulta di kuido aki na Boneiru, miéntras ku nos rumannan na Kòrsou tambe a duna di konosé ku nan kier sa mas di e mesa aki.

AFBW sigur ta bai konstrui e brùg den e sektor di kuido entre e seis islanan di eks Antia, pasobra interes di trahadó i su famia no konosé frontera.

Komo islanan chikí nos por hasi kosnan grandi i pa loke ta sektor di kuido nos ta realisá ku huntu nos por limitá mas tantu posibel e kompetensia riba e merkado laboral den kuido. Asina aki nos por duna un kontribushon na e mobilidat laboral dor di krea kondishonnan laboral harmonisá riba tur e islanan, hasi mas fasil pa interkambiá konosementu i eksperensha i asina ta bira mas fasil pa kambia di un organisashon den kuido pa un otro sin importá riba kua di  e islanan bo ta biba. Esaki ta puntonan importante pa tin un merkado laboral den kuido ku ta funshoná bon i salú kual ta nesesario pa por sigui duna kuido di kalidat na tur habitante.

E otro sektor den nos komunidat ku sindikalismo mester para firme i fiha un posishon fuerte ta e sektor di edukashon i enseñansa. E forma ku ta trata nos profeshonalnan den edukashon ta inakseptabel. Nan ta un sektor, meskos ku den kuido ku ta trata di hende ku tin ku karga responsabilidat pa yunan di otro hende. Pues mester duna nan e rèspèt, rekonosementu i e balor ku nan meresé.

I primeramente esaki mester ta un kompromiso inkondishonal di e direktivanan di skol. Ta nan mester krea e ambiente i sirkumstansia di trabou den kua e profeshonal por traha optimalmente ku plaser i orguyo den formashon di un generashon nobo.

Pero serka e profeshonal mes tambe mester biba e konsenshi di outoestima di outo rèspèt i di no akseptá un trato  inferior. Ser mener i yùfrou di skol banda di gana un salario ta un di e vokashonnan mas haltu den un komunidat.

Ta den boso man formashon di e futuro generashon ta. Ta boso ta e agentenan di kambio den un sosiedat. I aki e yamada na SIMABO ta pa kaba di reorganisá, pone un direktiva representativo for di henter e sektor awe i no mañan.

Mobilisá maestro, mayor i muchanan pa huntu krea e vishon edukativo di mas aña den kua ta reflehá komo base e identidat di e pueblo boneriano i traha riba e kalidat di enseñansa poniendo e mucha sentral i traha huntu ku e mayornan pa forma siudadanonan kritiko, pero alabes ku disiplina pa karga responsabilidat di e rumbo di Boneiru pa mañan.

Aki tambe ta konta ku ta nos na Boneiru mester tuma e inisiativa, ta nos mester determiná ki sosiedat nos kier konstruí pa mañan.

No sinta man krusá laga otro dikta rumbo di nos edukashon i enseñansa i para na banda i lamentá i yora ku nan a tuma over.

Nan no por tuma over si no ta nos mes ofresé nan pa tuma over. Mira i kopia e sektor di kuido, kaminda a keda demonstrá i probá ku nos por, basta nos ke

FUENTE: NÒCHI WILLEM/LIVE99FM