UPB NUNKA A KAMBIA DI VISHON PA BONEIRU

Kralendijk,- James Kroon ta reakshoná riba algun preokupashon ku a surgi den asuntu di atendé ku Hulanda ora ta trata di palabrashonnan.

 Promé ku tur kos ta bon pa un i tur komprondé ku UPB ta e úniko partido na Boneiru ku tin un vishon kla pa Boneiru i no a kambia nunka di direkshon. UPB a para pa derechi igual di desaroyo di hendenan aki na Boneiru i ta sigui hasi esaki. Ta UPB a sòru pa awe Boneiru tin mihó posibilidat di desaroyo. Awor ku nos ta parti di Hulanda, no ta nifiká ku UPB mester ta “ja-meneer” ku Hulandesnan. Nos ta den otro époka i UPB ta sigui bringa pa derechi di desaroyo igual pa nos Bonerianonan i awor denter di Hulanda.

UPB awor aki ta den oposishon pero tin algun hende no ta komprondé esaki. UPB awor aki no tin ningun kuenta, ni rason, di duna tokante di maneho di Boneiru, pasobra UPB no ta den gobièrnu. UPB ta den oposishon.

Ta trabou di ClarkAbraham i Daisy Coffie pa duna kuenta i rason di asuntunan di struktura estatal di Boneiru. Esun ku ke sa kiko ta bai pasa ku Representante di Reino (Rijksvertegenwoordiger), bai puntra Clark i Daisy. Ta pa motibu di falta di liderazgo di e dos personanan aki, Hulanda a bolbe falta ku palabrashonnan ku Boneiru.

E rèspèt ku Hulanda tabatin pa Boneiru a disparsékompletamente pa motibu di Clark i Daisy. No tin kontrol riba presupuesto di Boneiru, ta saka sènnan ilegal for di finansa di Boneiru, SELIBON ta den problemanan grandi, TCB ta den problemanan grandi, avionnan lo stòp di bula Boneiru, lentfildi Lagun ta den problema serio i asina por sigui nombra mas problemanan serio ku Boneiru tin.

Anto miéntras Boneiru tin e problemanan aki, Clark i Daisy ta sigui parti pastechi pa otro. E ora ei, nos mester komprondéku Hulanda kier bolbe buta Representante di Reino pa kontrolá Boneiru. Ta pa gobernashon deskabeyá i falta di direkshon di parti di Clark i Daisy ta pone ku Hulanda no tin konfiansa den Boneiru.

Awor ku Hulanda a falta ku palabrashon, bo no ta tende nada di Clark i muchu ménos di Daisy. Tur dos a kore bai skonde.

Nos ta bolbe ripití, UPB ta den oposishon. Ta kuater miembro di Konseho Insular tin ta sostené gobiernu di Clark i Daisy, tres di Partido Democrat i unu di M21. Tin un di sinku miembro pero esaki ta independiente.

Pues Boneiru komprondé bon ta ken ta responsabel pa e desaster di gobernashon ku nos ta pasando aden.

FUENTE: MIEMBRO DI FRAKSHON UPB DI KONSEHO INSULAR SR. PABLO J. KROON.