SINDIKALISMO TA PREOKUPÁ KU NOS MERKADO LABORAL POKO POKO PERO SIGUR TA SALIENDO FOR DI BALANSA.

 Kralendijk,- Ya pa basta tempu nos ta señalando ku tin práktikanan den nos merkado laboral ta tumando lugá ku ta krea inseguridat serka e trahadó.

Speshalmente  e trahadónan ku no ta kai bou di un CAO ta eksperenshando e inseguridat aki. Loke nos ta konstatá ta e reglanan eksistente pa e asina yamá kontraktnan temporal i esnan independiente yamá “zzp’ers” no ta duna klaridat riba e relashon laboral. Nos ta tuma nota ku mas i mas dunadónan di trabou ta usa e asina yamá “nul-uren contract i oproepcontract” bou di e kapa di fleksibilisá e merkado laboral.

Ta un invento sumamente kreativo pa desviá e lei di retiro ku nan ta konsiderá sofokante, ya ku nan no por retirá trahadó sin mas. Nos ta di opinion ku mester eliminá e nul-urencontract ei pasobra e ta krea hopi inseguridat. Tin vários kaso konosí serka sindikalismo kaminda e trahadó ta riba e 0-uren contract, pero ta traha 40 ora pa siman i pa tempu largu. Nos tin kaso di hasta 3 aña di 40 ora pa siman pero bou di 0-urencontract.

E asina yamá “oproepcontract” tambe ta krea inseguridat, pasobra su kondishonnan no ta kla definí. Ta p’esei sindikalismo ta apoyá i sostené e pensamentu pa eliminá e dos tipo di contractnan aki i remplasá nan ku un tipo di kontrakt básiko den kual ta stipulá komo standard un kantidat minimo di ora di trabou. Dado kaso e trahadó traha mas ora den un forma struktural, mester adapatá e kontrakto básiko. Asina e trahadó sa na unda e ta pará. Tambe nos tin kaso di trahadónan ku ta traha mas ku un aña komo “uitzendkracht” kual na nos opinion ta kontra di e lei ku ta regla ponementu di trahadó na disposishon. Na nos opinion mester ofresé un trahadó asina un kontrakto laboral pa tempu indefiní. Un otro desbalansa ta e forma ku ta apliká e reglanan pa trabou temporal, e asina yama kontraktonan temporal

. Na e momentonan aki ta asina ku despues di 3 kontrakto temporal konsekutivo e empleadp outomátikamente ta drenta den servisio indefiní, pues loke nos konosé komo vaste dienst. Kiko ta sosodé hopi biaha. Pa evitá ku ta tuma e trahadó den vaste dienst ta retiré i despues di seis luna ta bolbe tumé i e proseso di tres biaha kontrakto temporal ta kuminsá.

Na Ulandes nan ta yama esaki “draaideurconstructie” ku atrobe ta pone e trahadó den inseguridat. Na nos opinion mester hasi e término di seis luna aki muchu mas largu, por ehèmpel 5 aña promé ku bo por tuma e mesun trahadó ei atrobe riba e kontrakt temporal di 3 biaha ei. Tambe mester krea un forma di un un seguro obligatorio pagabel pa “independientenan”  òf miho bisá e “zzp’ersnan”ora nan bira malu di moda ku nan no mester preokupá ku nan ta keda sin entrada.

Finalmente nos kier dirigí nos mes na e imigrantenan i tambe na e asosashon di nan. Boso ta bira viktima di tur sorto di desbalanse riba e merkado laboral di Boneiru i boso ta suheto na hopi abuso, eksplotashon i diskriminashon. Siman pasá nos a menshoná algun kaso konkreto, manera entre otro ku boso no por haña alargashon di boso estadia pa medio di un alargashon di boso pèrmit di trabou, pasobra boso dunadó di trabou ku a kontratá boso no a paga òf tin debe atrasá di belasten.

Esaki ta pone ku boso ta bira indokumentá i por keda deportá. Tin indikashon ku boso dunadó di trabou ta eksigí boso Di entregá un parti di boso salario mensual pa paga sierto gastunan ku nan lo a hasi supuestamente pa trese boso aki. Varios di boso ta risibí ménos ku e sueldo mínimo legalmente stipulá, miéntras boso tin ku biba konstantemente bou di menasa i intimidashon di  dunadó di trabou.

Práktikanan ku ta totalmente inakseptabel i kondenabel den nos estado di derecho demokrátiko ku ta mará na tratadonan internashonal di derechonan humano fundamental. E úniko manera pa boso yuda nos pero mas tantu yuda boso mes pa solushoná e problema serio i inhumano aki ta di uni boso mes den un sindikato.

Den e forma ei boso tin e garantia di anonimidat ku boso no ta pará boso so frente e mònster di poder di kapital i di dunadó di trabou di mala fe. Sindikato ta boso seguro i nos lo ta boso bos pa eliminá i ranka ku rais e práktikanan di abuso, eksplotashon i deskriminashon di boso komo trahadó. Nos ta balorá boso, e pregunta ta boso mes ta balorá boso mes òf boso kier sigui biba i karga e yugo di sklabitut moderno.

Ta unikamente boso i boso so ku boso konsenshi lo por kontestá e pregunta. Boso tambe mester vense e sombra di miedu i tuma e batuta di kurashi i liberá boso mes.

FUENTE: NÒCHI WILLEM/LIVE99FM