CHARLA 77

Kralendijk,- Ora un persona no ta sigui e liña ku esun normal den un komunidat e ta un persona disidente.

Istoria a konosé hopi disidente i na Bonaire sigur Medardo De Marchena ta un disidente. E sigur a a sali na defensa di e personanan pretu i a ataká iglesia Katóliko ku tabata oprimí e hende pretu.

Medardo tabata será na Bonaire durante di di dos guera mundial akusá di ta enemigu di estado. Disidente no ta un persona ku ta kritiká so pero e ta sali na defensa di e hende basa riba e pensamentu humanista.

Hende tin e libertat di pensamentu i ehekushon di su pensamentu den kritiká su komunidat ku por kousa su libertat, sea kastigu di prizòn largu òf morto òf ekskluí e persona for di komunidat. Na Bonaire mi ta mira ku tin tur sorto di kritiká riba gobernashon, salubridat, komportashon di hubentut, enseñansa, ekonomia, bibienda popular i pobresa pero ta konformá ku e situashon i ta bisa ku no por hasi nada.

Pues nos por papia di personanan konformista. Puntonan riba kua mi no ta konformista ta; enseñansa, historia, papiamentu, LHBTQ+ i sentido komunitario.

Mi ta boga ya pa basta tempu ku mester bini un HBO na Bonaire pa evitá ku ta keda tene nos alumnonan abou i ora nan bai studia afó tur kore hunga hende drechi i ke pa nan bini kas bèk. Sekretario di Estado ta na Bonaire i ta na su lugá pa atendé e punto aki.

Pa istoria di Bonaire mester mas investigashon di nos ekspertonan i no keda pegá den e punto bista europeo i no romantisá istoria di Bonaire.

Idioma Papiamentu mester haña atenshon di tur hende pa evitá ku e ta bira algu elitario i eksklusivo. Piskadó, kunukero tambe ta aportá.

Na Bonaire ta diskriminá i ekskluí personanan di otro orientashon seksual, loke ta inhumano. Loke ta trata sentido komunitario kisas no ta pensa riba e atakenan brutal di Inteligensia Artifisial i kontrol riba nos ser humano.

E defensa fofo ta; nos ta haña mas konosementu i konektividat ku mundu, pero lubidá riba loke yama bida real i privasidat.

FUENTE: ARTHUR SEALY/LIVE99FM