POLITIKA KU KURASON Y KONSENSHI

Kralendijk,- Mi ke ekspresá na promé lugá mi desapunto ku e komportashon i deklarashonnan durante e reunion di Konseho Insular riba djaweps 14 di ougùstùs.

E falta di rèspèt i sensibilidat na despedida di e diputadonan saliente i e manera ku a risibí e diputadonan nobo tabata indigno. E komportashon aki ta daña nos demokrasia i ta mina e konfiansa ku e pueblo di Boneiru ta pone den nos.

Mi a drenta polítika pa sirbi nos komunidat. Pa traha riba kosnan ku ta benifisia nos pueblo kompletu, pa asina nos, komo Boneriano, por konstruí un isla mas hustu, duradereo i mas fuerte. E reunion, ku tabatin solamente un punto di agenda, e huramentashon di dos diputado nobo, mester tabata un momentu di konekshon, dignidat i liderazgo ku ta wak pa futuro.

En bes di esei, el a bira un anochi di reclamo i divishon. Esaki no solamente ta desepshonante, pero tambe inakseptabel.

Pa aklará mi posishon, mi ke enfatisá lo siguiente.
Na e diputadonan saliente, Sra. Nina den Heyer i Sra. Anjelica Cicilia, mi a haña nan kolaborashon sumamente profeshonal i balioso.

Boso dedikashon, compromiso, y pashon pa bienestar di nos pueblo ta atmirabel. Mi ta berdaderamente agradesido pa esaki. Ta tristu ku e periodo den funshon a bai acompaña di tantu akusashon nan bago I innesesario sigur di opositor nan den politika ku awe ta papia tur kos bon di bosnan. Un di e lèsnan ku nos mester siña for di esaki ta ku apresio i rèspèt mester wòrdu ekspresá durante un hende su periodo di gobernashon, I no solamente despues ku nan a bai.

Na e diputadonan nobo, Sr. Peter Silberie y Sr. Anthony Weber, un kaluroso bon bini. Mi ta deseá boso hopi éksito, sabiduria i determinashon den e tarea imortante aki. Un responsabilidad grandi ta sosega riba boso schouder, pero tambe un tremendo oportunidad pa aporta na un kambio positivo. Mi ta spera un kolaborashon profeshonal basá riba rèspèt i e interesnan komun di nos komunidat Boneriano. Boso por konta ku mi sosten.

A bira tempu pa nos, komo miembronan di Konseho Insular, tuma nos ròl komo representante di pueblo na serio. Tempu pa kombertí palabranan den akshon. Sea bo ta parti di e koalishon òf di oposishon, e no mester hasi un diferensia ora ta trata di integridat, desensia i servisio.
Huntu, ku rèspèt i dedikashon, pa un mihó Boneiru.

FUENTE: DANIEL CRESTIAN, FRAKSHON DI DEMOCRAT