FUNDASHON PRO LAGUN DEN DIÁLOGO KU SEKRETARIO DI ESTADO SZABÓ

Kralendijk, – Riba 26 di mei, Fundashon Pro Lagun a tene un konsulta konstruktivo ku Sekretario di Estado Zsolt Szabó i su delegashon tokante e problemanan andando rondó di e landfill na Lagun. E momento aki ta marka un paso importante pa e Fundashon den e kampaña pa pone e politika inadekua di gobièrnunan pa ku e maneho inefektivo di tereno di landfill riba agènda.

Salú ta promé – nesesidat di un investigashon independiente

Durante e entrevista ku e sekretario, Pro Lagun a enfatisá ku salú públiko mester ta prioridat. E fundashon ta insistí riba un investigashon independiente tokante e daño pa salú kousá pa e landfill i e fòrnu di kimamentu. E fòrnu ta pagá i e tèstnan a mustra klaramente ku e límite di emishon a wòrdu superá. Pero no tin niun investigashon riba e daño físiko real den e bario. Tin evidensia anekdótiko di un kantidat elevá di kaso di malesa rònt di e landfill. Un investigashon di salú relashoná ku e emishonnan kontaminante ta nesesario i hustifiká despues di hopi aña di molèster.

E landfill mester sera

Fundashon ta pone kla ku e landfill mester sera mas pronto ku ta posibel. Tur desecho ku ta wòrdu pone ei awor mester wòrdu limpiá den futuro serka. E área ta sensibel i mester wòrdu protehá pa bienestar di e habitantenan, e naturalesa i e medioambiente.

Di papia pa akshon – ku partisipashon di Hulanda

Durante e dialogo ku Zsolt Szabó, a keda kla ku Fundashon Pro Lagun i su komunidat ya no tin konfiansa den mas papelnan i plan di akshon. Nan ta eksigí akshon konkretu i ku Hulanda mes tuma su responsabilidat pa solushon struktural. “E problema ta konosí ya pa hopi aña, tambe na Hulanda. Awor ta ora pa tuma akshon. Nos no por sigui ku mas reunion i plan riba papel. Mester hopi liderato i desishon fuerte. Ban laga e mundu di papel pa por logra e solushonnan real,” segun Verbeek.

Esaki ta un asunto di henter e isla

Aunke Fundashon Pro Lagun tin su raiznan na Lagun, nan ta enfatisá ku e konsekuensianan di un landfill mal manehá ta afektá henter e isla: mal kalidat di aire, malesa, kontaminashon i pèrdida di biodiversidat. Fundashon Pro Lagun ta hasi un yamada na tur lider i polítiko pa traha huntu pa un Boneiru salú i habitabel.

FUENTE: FUNDASHON PRO LAGUN/LIVE99FM