Kralendijk.- Komo tabata tempu di krísis mi a skohe dos buki pa bolbe lesa. Nan ta “La Peste” di Albert Camus i “De stad der blinden” di Jose Saramago Tur dos ta mustra riba e apsurdes ku ta reina serka hende.
E epidemia ta kaba pero e vírus ta keda i por bolbe lanta kabes. Na Bonaire tin un epidemia kousá pa e vírus ku yama “PP 23” ku ta poder polítiko ku a kuminsá na òktober 2023 ku un Kolegio Ehekutivo nobo.
A para trabou, ámtenarnan ku ta kore bai, konseho Insular i diputadonan ku bòshi privilegio ta biaha sin duna informashon, pèrmit pa tereno a bira un privilegio, trabou na edifisionan di gobièrnu no ta duna muestra di progreso, tin problema ta vislumbrá ku bida ta bai bira aun mas karu ku konsekuensia pa salubridat i siguridat sosial i e situashon na Selibon Lagun.
E remedi kontra un parti di e vírus ta “Indeplaatssteling” ku por apliká tambe riba Konseho Insular i Kolegio Ehekutivo mirando e posishon tumá di Kolegio Ehekutivo I Konseho Insular, spesial koalishon, kontra Representante interino di Reino. E vupá kometé pa konseho Insular ta pa invitá Representante interino di Reino bin responsabilisá su desishon den konseho Insular. Un tiki konosementu di lei lo a evitá e eror aki. Esaki ta muestra di a pèrdè bista riba lei, regla i interes di pueblo i ta nenga koperá pa atendé problema ku ta toka henter pueblo.
E bukinan “La Peste” (1947) i “De stad der blinden” (1995) ta ilustrá e parti maligno den hende na momentu di epidemia. Konseho Insular i Kolegio Ehekutivo mester demostrá mas kurashi aseptá ku a kometé eror i buska koperashon na benefisio di pueblo.
FUENTE:ARTHUR SEALY/ LIVE99FM

GIPHY App Key not set. Please check settings