SUPERANDO 200 AÑA DI ATVERSIDAT, OPSTÁKULO I DESAFIO

Kralendijk,- Riba e lista di 1824 ta parase un ‘pannenhuis’ komo un di e pertenenshanan di gobièrnu ulandes. A laga traha e Mangazina aki pa 2700 florin.

Akinan katibunan tabata bin tuma nan rantsun. E tempu ei Willem I tabata e rei i henter Boneiru tabata un plantashi di gobièrnu. Awor aki Mangazina di Rei ta parti di un parke kultural kaminda bo por eksperensha e dushi kultura di Boneiru.

Djadumingu último fundashon Mangazina di Rei a wak bèk riba e 200 aña di historia i herensha rondo di e edifisio Mangazina di Rei. Durante di e enkuentro a para ketu huntu ku invitadonan na e bida ku esnan sklavisa tabatin i kiko tur nan a pasa aden. Martis di Katalina Janga ta un di e personanan ku a lanta kontra di e trato inhustu i inhumano ku nan tabata haña. Kiko Martis lo a bisa nos si e por tabata presente na e okashon aki.

Kisas e lo por a puntra kiko nos a hasi ku e libertat ku nan a bringa pe. Bo por a lanta sin un mayor na kas. Kisas bo ta wòrdu di buli na skol. Bo a pèrde trabou òf a pasa dor di un divorsio. Kosnan ku nos ta pasa aden por laga nos marká i por pone nos pensa meskos ku esnan sklavisa ku nos no ta sirbi òf ku nos ta mahos. Aunke ku no ta fasil pa dil ku tur esaki ta importante pa no laga e pensamentunan aki domina bo. Buska sosten serka famia, amigu òf profeshonalnan pa yuda bo prosesa lokual ku a marka bo. Asina bo por re-marka ku bo por usa bo talentonan pa krea algu nobo no opstante lokual ku bo a pasa aden. Ku otro palabra no laga bo pasado dikta bo futuro pero ‘Lanta’riba i libra e rei òf reina den bo’. Kultiva dominio propio i usa e eksperensha ku bo a pasa aden pa yuda otronan ku tambe ta pasando den mesun kos. Huntu nos por yuda Boneiru bai dilanti i asina eleva otro. Esaki lo ta remarkabel. A base di e mensahe aki Mangazina di Rei a lansa su kampaña edukativo Lanta’riba i libra e rei(na) den bo. Komo parti di esaki Nochi Coffie a bini ku e inisiativa pa krea un arte na honor di Martis di Katalina Janga den e museo di kunuku ku Mangazina di Rei ta desaroyando. Aki lo ekspone tambe e trabounan ku esnan sklavisa tabata hasi den kunuku i ku awor ta parti di nos herensha kultural. A base di esaki FuHiKuBo ta trahando riba un buki di e bida di Martis di Katalina Janga i huntu ku Mia Tweed di Vibra ta desaroyando diferente tayer pa hoben tokante di e impakto ku sklabitut tin den nos bida diario. E produktor Sendion Balentin ta trahando riba un pelikula kòrtiku di kua a presenta un trailer djadumingu último. I tambe lo bai traha riba un programa edukativo pa skolnan en koperashon ku gobièrnu i skolnan. E meta di e kampaña edukativo Lanta’riba ta pa yuda krea mas kargadonan di kultura hoben ku tin ku bai sigui pasa e batuta kultural pa e proksimo 200 aña. Asina aki Mangazina di Rei a wak bèk riba 200 aña ku Bonerianonan a sa di superá atversidat, opstákulo i desafio.

FUENTE: MANGAZINA DI REI RINCON/LIVE99FM