PROHIBI PA LUBIDA

Kralendijk,- Den e simannan ku a transkurí masha hopi sabio polítiko tabata den media na Boneiru. Relashoná ku formashon di gobièrnu direpente yen eksperto a sali for di kashi i sa mihó kon pa aktua den polítika di Boneiru. Echonan ta mustra diferente si.

Anto einan basta di e ekspertonan ta kai chikí. Lo mi kier pa e ekspertonan ei sali i bin splika mi e siguiente “teblachinan di oro” pa formashon di koalishonnan di pasado.

Ta masha teblachinan di oro tabatin pa formashon di koalishonnan den pasado, pero ata e echonan aki i pueblo husga pa bo mes.

Promé teblachi di oro. Na mart aña 2011 tabata e promé elekshon di Konseho Insular den e sistema nobo. UPB a gana elekshon pero a saka 4 asiento so pasobra den e sistema nobo di 75%, dos partido nobo, kada un a haña un asiento.

Pues PDB ku 3 asiento a forma koalishon ku e dos partidonan nobo ku kada un, 1 asiento.  A laga UPB ku 4 asiento den oposishon. Den ménos ku seis (6) luna gobièrnu, ku PDB a haña den teblachi di oro, a kai pasobra un di e miembronan di Konseho Insular di un di e partidonan nobo a tumba gobièrnu i bai traha koalishon ku UPB. UPB i e independiente a goberná tres aña i mei largu te ku elekshon na 2015. Resultado di elekshon tabata ku pueblo a straf UPB i tabata MPB ku tabata un partido nobo a gana elekshon pero a haña tres asiento so.

Despues di elekshon 2015, UPB (3) i PDB (3) a forma un koalishon. Na e momentu ei e di dos teblachi di oro a presentá i e biaha aki pa MPB. E koalishon UPB/PDB aki a dura 1 aña i gobièrnu a kai ora ku dos miembro di UPB a sali bira independiente i bai forma koalishon ku MPB. No dura muchu ku e koalishon di MPB, ku e a haña den teblachi di oro, ku e dos miembronan independiente a haña problema i gobièrnu a kai. UPB ku un miembro so den Konseho Insular a disidí di “gedoog” e gobièrnu pa kontinuidat di gobernashon.

E di tres teblachi di oro a presentá pa PDB. Tabata Lider di partido Demokrat, señor Clark Abraham, ku a saka dos miembro di Konseho Insular for di PDB i a bai forma koalishon ku MPB i un miembro independiente. E koalishon di PDB, MPB i un miembro independiente a dura nèt tres (3) siman. E gobièrnu aki a kai promé ku esaki a yega un luna di gobernashon.

E loke ta menshoná ariba ta lokual a hiba nos na teblachi di oro number 4. Na ougùstùs 2017 UPB, ku miéntras tantu a rekobrá su tres miembronan di Konseho Insular bek, a forma koalishon nobo ku dos miembro independiente, sali for di PDB. E koalishon nobo aki a dura kasi dos aña largu te ku elekshon di 2019.

Resultado di elekshon tabata ku pueblo a straf UPB i UPB a keda ku solamente dos (2) asiento despues di elekshon. MPB a gana elekshon i a saka kuater (4) asiento.

Einan a sigui un koalishon di MPB (4) i UPB (2) i a bira e úniko koalishon entre 2011-2026 ku a sinta kuater aña te ku elekshon. Apesar di problema nan interno den MPB kaminda sra. Daisy Coffie a bai ku un (1) asiento di MPB i un diputado di MPB a bai sostené PDB i sr.

Clark Abraham den elekshon di 2023. Resultado di e elekshon tabata ku pueblo a straf MPB malamente i MPB a keda ku dos (2) asiento despues di elekshon.

PDB a gana elekshon di mart 2023 grandemente ku 3900+ voto pero a haña tres (3) asiento meskos ku UPB. Despues di elekshon 2023 a forma koalishon di UPB (3) i MPB (2). No a dura muchu ku atrobe un miembro di MPB a bandoná e partido i bai ku e asiento di Konseho Insular. Gobièrnu a kai atrobe.

Lokual ta trese nos na “teblachi di oro number 5”.

PDB a haña gobièrnu den teblachi di oro i a forma koalishon ku dos eks miembro di MPB. PDB, M21 i e miembro independiente sali for di MPB a forma koalishon i for di e promé dia di e koalishon ta bringamentu so tabatin. E bringamentu a resultá den retiru di dos diputado di e koalishon i postulashon di dos diputado nobo.

No a dura muchu ku ata PDB ta pèrdè un miembro di Konseho Insular ku a sali i deklará su mes independiente. Téknikamente gobièrnu a bolbe kai. Atrobe “teblachi di oro” a resultá di ta “teblachi di shinishi”. Kualkier bientu ku supla e ta bula e teblachi bai ku e teblachi i gobièrnu ta kai.

Mi a skirbi hopi pero esaki ta pa ilustrá e “teblachinan di oro” ku tur e sabionan ta papia di dje. Awor a presentá “teblachi di oro number 6”. UPB tin di siña di e sinku (5) otro teblachinan òf pueblo kier pa UPB tuma e gobièrnu ku brasa habri ku ta keda presentá un biaha mas den teblachi di oro?

Di 2011 te ku 2023 e koalishonnan i gobièrnunan ku a sinta mas tantu tempu tabata na promé lugá: UPB-MPB – 2019 pa 2023, na di dos lugá: UPB – Santana – di òktober 2011 pa mart 2015 i na di tres lugá: UPB – Dos Independiente di PDB – di ougùstùs 2017 pa mart 2019. Pueblo husga pa bo mes!

Mi a skibi hopi pero ta prohibí pa lubidá e echonan aki.

FUENTE: PABLO (JAMES) KROON.