UN YAMADA DI ALERTA NA E KLASE TRAHADÓ I SU FAMIA.

HEI , ABO TRAHADÓ, BO KONOSÉ BO DERECHO ?

Kralendijk,- Lesa ku atenshon i komprondé ku nos komo trahadó no por sinta na banda i laga e situashon empeorá i mira kon nos representantenan en bes di goberná ta pleita i rabia ku otro pa kosnan puramente personal i partidista i ta laga interesnan di e pueblo kompletamente neglishá.

Dia 16 di aprel 2022, gobièrnu di Boneiru, Buisines Bonaire Federation, representando dunadónan di trabou  i USIBO, representando henter e klase trahadó i su famia na Boneiru a firma e “AKUERDO I KRALENDIJK”.

Esaki ku e propósito pa den e 5 aña, esta pa 2027 e sueldo mínimo, e ònderstant, e kompensashon pa yu i pa yu ku mester di kuido intensivo i tambe e penshun di behes mester keda oumentá supstanshalmente.

Banda di esaki e Akuerdo ta proponé tambe pa tene kosto di bida na un nivel akseptabel atraves di esfuersonan di tantu gobièrnu na Den Haag komo e gobièrnu na Kralendijk.

Pa hasi e  akuerdo mas amplio posibel a duna atenshon tambe na maneho di sosten. Pues den un forma madurá i bo argumentá, e tres partnernan a analisá e problema di pobresa, poné riba mesa i presentá solushonnan faktibel.

Un desaroyo históriko pa Boneiru den eliminá e retrasonan sosial riba kaminda pa mas prosperidat i bienestar pa TUR hende. Ta pa esei a lanta Diálogo Sentral.

Na 2023 sindikalismo mester a pone preshon sindikal ku koperashon di henter e pueblo den un manifestashon pasífiko popular i a aselerá e proseso di ehekushon di e maneho aki. I ku orguyo nos mester bisa ku nos a logra.

I ta ku tristesa, pero tambe desapuntá nos mester mira ku e trabounan balioso aki na fabor di henter e pueblo ta bai pèrdí en bes di nos huntu sigui konstruí riba e fundeshi bashá aki. Kiko nos ta mira pasando den realidat.

Pueblo Boneriano formá pa e klase trahadó i su famia ta ser sutá ku oumentonan fuerte di awa, koriente i gasolin. Esaki tin komo konsekuensia ku e mesun pueblo tin ku karga tambe ku oumento di hür di kas, inkluso esnan di Fundashon, oumento di transporte públiko, oumento di kuminda i oumento di kompra di kosnan personal nesesario. Mi ta duna un ehèmpel pa ilustrá kon ridíkulo preisnan ta.

Un saku di popcorn ku bo por kumpra pa hasi kurason di un chikitin kontentu ta kosta 8 dòlar ku 50 sèn, maginabo.

Nos sa ku Tienda pa Konsumidó ta hasi su máksimo efuerso pa kompará preisnan den tur e supermerkadonan i asina sostené e konsumidó pa hasi kompra na esun mas barata, pero unda gobièrnu ta ku un di e rekomendashonnan pa tin un kòntròl di preis severo.

Gobièrnu ta suppose di buska kontinuamente e balansa pa asina su siudadanonan por hiba un bida digno. Na unda nos representantenan a keda. 

Preis di koriente i awa ta subi, preis di kas ta subi, preis di kuminda ta subi, ta perhudiká nos grandinan i privanan di pasa nan behes den un foma agradabel i saludabel, infrastruktura ta na wèrki, no por kaba di entrodusí transporte públiko, pa haña un tereno pa konstruí bo propio kas ta un kaminda di krus. Na unda entrodukshon general di supsidio pa hür a keda.

Kiko ta e sentido di forma parti di Hulanda i nos liderato den gobernashon ta para i sinta mira kon ta trata nos komo siudadanonan di segunda rango i hasta e impreshon ta ku ta nos mes ta pèrmití, akseptá i stimulá esaki.

Sindikalismo ta pèrdiendo tur speransa i konfiansa ku por laga destino i desaroyo di nos komunidat den man di polítika so. A yega ora pa e pueblo, esta e klase trahadó i su famia laga nan bos resoná. I e famia di e trahadó ta for di e beibi te na e penshonado.

E pueblo no por soportá mas, e peso a bira di mas, e pueblo ta sufriendo. I mas tristu ta ku esfuersonan ku a duna resultado positivo pa loke ta entrada di kada un siudadano ta bai pèrdí pa falta di gobernashon stábil, gobernashon ku vishon i gobernashon ku ta tuma desishon na bienestar di e pueblo aki.

Histórikamente a keda probá ku e klase trahadó, uní den sindikalismo ta sentral den desaroyo sosial-ekonómiko duradero.

E forsa di sindikalismo no ta solamente atendé ku salario, nos ta e aktornan stratégiko pa yuda forma prosperidat ekonómiko, igualdat sosial, medio-ambiente sostenibel i un funshonamentu demokrátiko sano, kual ta di vital importansia pa un dearoyo sosial-ekonómiko pa largu tempu.

E mensahe pa e siman aki ta : No laga interes di polítko i partido dividí nos, pero laga interes di Boneiru i su desaroyo uni nos.

FUENTE: NORWIN NÒCHI WILLEM/LIVE99FM