TEMPU TA E MIHÓ MAESTRO

Kralendijk–Faltando diesun luna pa próksimo elekshon aki na Boneiru i nos ta na inisio di eksperensiá e di tres koalishon den e periodo di gobernashon 2023 pa 2027. 

Un rekapitulashon kòrtiku kon esaki a evolvé. 

Konosementu mester lidera sintimentu.Na mart 2023 PDB a gana elekshon komo e partido mas grandi na voto. Na mi opinion ta pasobra eskohonan stratégiko a wòrdu hasí di personanan pa poné riba lista ku tabatin hopi sigidornan i fanátikonan. Esaki a resultá ku hopi hende a vota pa PDB spesifikamente pa e motibu aki. Pero tambe den kombinashon ku e informashonnan negativo tokante e gobièrno ku tabata na mando a influensiá hopi di nos inosentenan pa vota pa PDB, no pa motibu di konosementu di realidat, pero mas bien pa motibu di impulso i emoshonnan ku a keda aktiva den sintimentunan di hopi.  

Kontinuashon di koalishon tabata nesesario.Direktamente despues di elekshon na mart 2023 partido M21 i PDB a firma un akuerdo di koperashon di frakshon ku otro. Hasiendo esaki aunke PDB tabata e partido mas grandi na voto, huntu ku e votonan di M21 tog ainda nan no tabatin e mayoria di tur e votonan valido di e kantidat di hendenan ku por a vota. UPB i MPB konsiente ku huntu nan resultadonan di elekshon lo a akumula e mayoria di e kantidat di e votonan valido, a skohe e ora ei konsientemente pa kontinuá e gobièrnu anterior. Lokual ku na mi opinion tabata inteligente pa hasi teniendo na kuenta e frikshonnan personal entre e dos partidonan aki ku e lider di partido PDB.

E mito Vrolijk :

Shete luna despues di elekshon na òktober 2023 un miembro di frakshon MPB den Konseho Insular a traishoná su partido i a bai ku su asiento. E desishon pa e traishon aki no a keda tuma di anochi pa mainta. Ta algu ku a wòrdu orkestrá den sekreto entre e traidor aki i su konseheronan i komplisenan. Esaki pues a resulta den un koalishon nobo na òktober 2023 konsistiendo di PDB, M21 i frakshon Vrolijk. Un akuerdo di gobernashon a keda firmá bou di e titulo ‘e diferensia hustu i duradero’ kual tabata konsisti di sinkuenta punto di enfoke.

Periodo turbulentiko den gobernashon.

Den un periodo di bintinuebe luna sinku diputado a tuma retiru. Na luna di yüli 2025 dos diputado hopi apresiá den komunidat a tuma nan retiru misteriosamente. Den luna di mart 2026 apénas ocho luna despues otro diputado a tuma retiru. I den e mesun luna aki e dos diputadonan restante tambe a entregá nan karta di retiru. Den un lapso di bintinuebe luna a primintí pueblo di Bonairu un diferensia hustu i duradero. Tabatin sinkuenta punto di atenshon. Pero realidat basá ariba e echonan ta indiká ku e resultado ku pueblo a risibí di e promesanan aki ta retiru di sinku diputado i niun prueba konkreto di kuantu di e puntonan poné den e akuerdo di gobernashon a keda konkretisá.

Ban kuminsá di nobo.

Dia dos di April 2026 un di tres koalishon a keda instalá den e periodo aktual di gobernashon. Pa asina por bai tèrminá e último diesun lunanan ku falta. I nos orashon komo parti di e komunidat aki ta pa Señor Dios trese personanan realmente integro den nos stulnan di gobernashon. Personanan ku personalmente nan bida ta na òrdu internamente i ku ta respetá nos norma i balornan kual mester ta fundá riba realidat i bèrdat i no tur tipo di ideologianan eroneo i toleransia ku ta garantisá ku nos lo kontinuá birando rònt den konfushon i desakuerdo i sin un direkshon i vishon konkreto kon salú nos ta deseá pa nos kondishon mental komo komunidat mester bira.

FUENTE: NOËL JANGA