Redakshon
Kralendijk,- Mi tin bastante aña ta militá den sindikalismo i mi ta sinti ku mas i mas sindikalismo su ròl i importansia den nos komunidat di awe i esun di futuro ta uno di partisipá aktivamente den konstruí un komunidat ku un desaroyo sosial-ekonómiko duradero i balansá.
Duradero pa garantisá oportunidatnan di trabou, pero alabes oportunidatnan pa kada ken por tin un desaroyo personal fruktífero den kua e ta realisá su soñonan.
Sindikalismo su maneho mester ta di rekonosé e responsabilidat di e individuo pa den tur libertat hasi su eskoho di su bida, esta kon e kier bibé, pero alabes sindikalismo ta rekonosé ku e prosperidat ku nos tur huntu ta konstruí mester ser repartí kolektivamente den provishonnan ku nos tur ta benefisiá for di dje. Boneiru ta den pleno desaroyo, pero rapòrtnan mas i mas ta indikando ku e desaroyo aki ta tradusiendo su mes den un eksploshon inkontrolá di poblashon, pero ku un repartishon di prosperidat desigual ku ta desbalansando e komunidat sosialmente.
Un otro efekto negativo ta ku e desaroyo aki den práktika a demonstrá di ta kreando skarsedat den vivienda i den tereno disponibel pa traha kas. Lo bo puntra bo mes kiko sindikalismo tin di haber ku e puntonan aki. Wèl ta bon pa realisá ku e desaroyo aki ta afektá e klase trahadó mediano i esnan mas abou di e trapi sosial hopi fuerte.
Ta nan ta ser konfrontá ku un kosto di bida haltu netamente stimulá pa falta di viviendanan pagabel i ku pa falta di tereno i ku kosto di konstrukshon i infrastruktura haltu no por yega na propio kas tampoko. E falta di labor lokal kalifiká ku e konsekuensia ku mester importá trahadó tambe ta resultado di e desaroyo ku nos ta pasando aden.
Aki tambe nos komunidat ta konfrontá ku e fenómeno di falta di integrashon di diferente kultura i hasta ku e menasa serio di pèrdè nos propio kultura, kual ta nos identidat komo pueblo boneriano. E preshon riba nos sistema di enseñansa, riba nos sistema di kuido ta oumentá e preshon riba e klase trahadó den e sektornan ei enorme ku tur su konsekuensianan.
I e desaroyo aki bo no ta enfrenté ku un sindikalismo basá riba sistemanan mikro, esta di sinta na mesa negoshá oumento salarial i otro kondishonnan laboral so. E ta rekerí un vishon di unda nos kier mira Boneiru na aña 2050.
E ta rekerí un vishon di ki sorto di ekonomia nos kier desaroyá ku ta kuadra ku nos desaroyo sosial-ekonómiko i ekológiko. E ta rekerí un vishon kon grandi nos kier pa nos poblashon krese den e próksimo 25 añanan. E ta rekeri ki tipo di labor lo ta disponibel i ki tipo di trahadó nos mester bai na forma ku e konosementu i abilidatnan nesesario pa karga e desaroyo aki.
Pues tin trabou pa hasi den 2025 i sindikalismo lo hasi bon di hasi un esfuerso i tuma e inisiativa pa fomentá un diálogo ekonómiko pa asina buska konsenso entre e tres partnernan, esta gobièrnu, sektor empresarial i esun laboral pa atendé e tema aki. 15 novèmber 2024 Dialogo Sentral a informá ku nan ta preokupá ku e desaroyo no faborabel di nos ekonomia.
Den e mesun luna ei Dialogo Sentral a señalá ku e ta hopi preokupá ku e desaroyo negativo di nos forsa di kompra. Sufisiente señal pa nos uni forsa i rebibá loke nos a seya den AKUERDO DI SALIÑA na febrüari 2020, esta Boneiru ku un futuro briante, kual tabata un kuadro di maneho komun di Dialogo Sentral. No laga e akuerdo aki keda na palabra i skibí riba papel so.
Ban poné den práktika ku proyektonan konkreto i tangibel. Nos a proba kaba ku nos por riba e aria sosial. Ban inspirá otro. Nos por basta nos ke
FUENTE: NÒCHI WILLEM/LIVE99FM
GIPHY App Key not set. Please check settings