Redakshon
HEI , ABO TRAHADÓ, BO KONOSÉ BO DERECHO ? PARTI 4.
Kralendijk,- Nos a trata e derechonan ku ta ankrá den nos leinan i ku ta obligatorio pa kumpli ku nan. Nan ta garantisá ku na boka di trabou ta trata e trahadó ku rèspèt, ta rekonosé i balorisá e trahadó i ta rekompensé den un forma hustu i honesto.
Ta e leinan aki ta garantisá ku e trahadó por ehersé su labor den un ambiente sigur i salú. Ta e leinan aki ta prohibí deskriminashon den kualkier forma na boka di trabou, miéntras ku kontratonan kolektivo ta perkurá pa igualdat riba boka di trabou i ta boga pa mehorá e kondishonnan di trabou. CAO-nan pa definishon ta mas tantu ku e lei. E leinan ta regla e minimo ku mester tuma lugá i semper sindikalismo ta lucha i konvensé e dunadó di trabou ku balor di e trahadó ta pa semper mehorá e kompensashon i kondishonnan pasobra esei ta stimulá produktividat ku riba su turno ta oumentá e ganashi di e kompania. Pues e ta krea un situashon ku ámbos partido ta gana. Awe nos kier komparti e fundeshi di e relashon di trabou, kual ta E AKUERDO DI TRABOU, E KONTRAKT KU DUNADÓ DI TRABOU I TRAHADÓ TA SERA KU OTRO.
E kòntrakt no ta stipulá solamente bo salario i oranan di trabou, pero ta den dje ta regla e derecho- i obligashonnan di tantu e dunadó di trabou komo e trahadó. Dunadónan di trabou por ehèmpel tin e obligashon pa perkurá pa e ambiente di trabou ta sigur i salú i tambe pa paga e trahadó na ora. Trahadónan na nan turno tin e oblligashon pa kumpli ku e trabou akordá i tambe sigui instrukshonnan.
Na Boneiru nos konosé e siguiente kòntraktnan: kòntrakt fiho, kòntrakt temporal, i algun kòntrakt spesífiko manera kontrakt riba yamada i e kontrakt di sero ora. Ta importante pa traha kòntraktnan den un forma ku koutela pasobra esaki na promé lugá por garantisá un relashon di trabou ku éksito. Ta importante ku dunadó di trabou ta ofresé un kòntrakt ku ta kumpli ku tur eksigensianan di lei, pero ku alabes ta protehá interesnan di su kompania. Esaki ta nifiká palabrashonnan por eskrito kla i raspá. Un buki di funshon den kua ta deskribí e funshonnan ku nan tareanan, e skal ku nan ta kai den dje i e salario ku ta korespondé na e funshon. Ta den e buki aki ku mester ta transparente pa tur hende e trahadó por determiná na unda e ta drenta e kompania i na unda e por yega na salario, pero tambe kon e por krese den e kompania informando i formando su mes den su funshon. Trahadó mester por konta i konfia ku e ta protehá den e kòntrakt i ku e dunadó di trabou no ta laga e firma un kòntrakt djies pasobra e ta den mester di un trabou pero ku den e kòntrakt no ta pone kondishonnan ku ta kontra lei i ku ta perhudiká e trahadó. Den idioma sindikal esaki yama abusá i eksplotá trahadó di parti di dunadónan di trabou di mala fe manera gezaghèber John Soliana i presidente di AFBW, Cherel Kwidama a denominá nan den nan diskurso di Dia di Labor. E tipo di dunadónan di trabou ei nos no tin mester. Asuntunan manera salario, dianan di fakashon, penshun, pero tambe posibilidat di formashon, adaptashon na kosto di bida, seguridat, aspektonan di salú pago di overtaim, pago di dianan di malesa, di embaraso, di desgrasia ets. Tur mester ta reglá den e kòntrakt. Si e kompania tin un CAO, den e kòntrakt no por tin reglanan ku ta bai kontra di e CAO. Un konseho ku sindikalismo lo no kansa di duna ta; No firma nada promé ku bo laga un hende ku konosementu lesa bo kòntrakt òf kualkier otro dokumentu. Lei ta dunabo tempu pa lesa i pensa, pues bo no tin ningun obligashon pa firma un bes. Detayenan chikitu den bo kòntrakt ku bo no ta kai ariba, por tin konsekuensia grandi pa bo posishon hurídiko. Speshalmente na momento di un konflikto o den kaso di retiro. E lema di siman pa reflekshoná riba dje ta: “Sindikalismo ta organisá trahadónan riba e prinsipio di: ” Esnan mas Fuerte lo yuda esnan mas débil”. Konosé bo derecho ta un yudansa fuerte pa abo komo trahadó pa hasibo mas konsiente di bo balor komo trahadó.” Bo ta miembro di sindikato? Kiko bo ta warda, inskribi awe mes.
FUENTE: NORWIN NÒCHI WILLEM
GIPHY App Key not set. Please check settings