KORSOU: CFT: “KRESEMENTU DI TURISMO TA REKERÍ ESKOHONAN PA UN FUTURO SOSTENIBEL”

Willemstad – Kolegio di supervishon finansiero Kòrsou i Sint Maarten (Cft) ta enfatisá ku kresementu di turismo ta trese oportunidatnan ekonómiko pa Kòrsou, sinembargo, e ta eksponé retonan nobo tambe. Cft ta konsehá Gobièrnu pa yega na un vishon integral i kordinashon klaramente enfoká riba e desaroyo deseá di turismo. Solamente di e manera aki, turismo por kontribuí na prosperidat i sostenibilidat finansiero riba término largu tambe.

E desaroyo di turismo ta un motor di kresementu ekonómiko importante pa Kòrsou. Sinembargo, e éksito persistente ta kondusí na un oumento di e preshon riba e kapasidat finansiero di e isla. Tur biaha mas, fasilidatnan públiko i rekursonan natural ta yega na nan límite. Ehèmpelnan di esaki ta inkluí e kapasidat di aeropuerto, e oumento di aglomerashon den tráfiko, e preshon riba e merkado di bibienda i e estado di salú di e refnan di koral.

Cft ta mustra riba e echo ku kresementu deskontrolá finalmente por mina e atraktivo di Kòrsou komo destino turístiko. P’esei, kresementu kontinuá ta rekerí maneho for di Gobièrnu, koperashon ku partnernan sosial i invershonnan dirigí entre otro den infrastruktura, prosesamentu di shushi, energia i konservashon di naturalesa.

Struktura ekonómiko

E kresementu di turismo ta kambia e struktura ekonómiko di e isla tambe. Sifranan di Fondo Monetario Internashonal ta mustra ku e empleo ta kambia tur biaha mas pa funshonnan di pago abou i pa aktividatnan informal, miéntras tin redukshon di puestonan di empleo formal. Esaki tin konsekuensianan pa e entradanan di impuesto i finansiamentu di seguronan sosial.

Tin oportunidatnan pa Kòrsou pa oumentá e balor agregá ekonómiko di turismo. Cft ta suprayá e importansia di kresementu kualitativo en bes di kuantitativo di turismo. Mester enfoká riba un oumento di empleo formal, mas produktividat laboral, mas plusvalia ekonómiko lokal i un base fiskal mas amplio. Insentivanan finansiero i fiskal dirigí por apoyá e desaroyo deseá di turismo. Di e manera aki, desaroyo di turismo por kontribuí na un ekonomia sostenibel prepará pa futuro.

Presupuesto pa 2027 i añanan posterior

Entre otro debí na desaroyonan ekonómiko favorabel, pa e periodo 2027-2030, Kòrsou ta estimá surplusnan presupuestario amplio. Sinembargo, e ekonomia ta keda vulnerabel pa shòknan i riesgonan finansiero. Ademas, Kòrsou ta enfrentá diferente desafio finansiero. Por ehèmpel, ainda no a finalisá e solushon pa e situashon finansiero di Curaçao Medical Center. For di un punto di bista mas amplio, e sostenibilidat finansiero struktural di e fondonan di kuido i seguridat sosial ta un reto konsiderabel. Konsiderando e preshon di gastunan kolektivo haltu riba Kòrsou, ta importante pa implementá reformanan den kuido i seguridat sosial pa asina salbaguardiá e sostenibilidat finansiero.

FUENTE: CFT KORSOU/LIVE99FM